Shaboozey ‘A Bar Song (Tipsy)’ a la Hot ber

On Sep 18, 2024 30 0

Shaboozey ‘A Bar Song (Tipsy)’ a la Hot ber
Shaboozey hla hit ‘A Bar Song (Tipsy)’ chu Billboard Hot 100 (singles) chart-ah a No.1 a, he chart-ah hian kar 10 a No.1 tling ta a, kumina he chart-a No.1 ni rei thei ber a la ni. Billboard Hot 100 chart history-ah kum 66 chhungin kar 10 chin chart No.1 ni thei hi hla 45 chiah a la awm a, chu chu he chart-a No.1 ni tawh zawng zawng atanga chhutin 4% chiah a la ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
‘A Bar Song (Tipsy)’ hi Shaboozey hla Hot 100 chart-a No.1 kai thei hmasa ber niin, July thla khan a vawi khat nan a rawn No.1 a, tunah hian kar khat chhungin stream maktaduai 29.3 leh sales 10,000 neiin, radio airplay-ah pawh ngaithlatu maktaduai 76.8 a la nei thei a, hei hi chart-ah a kar 10 nan No.1 pui leh ta a ni.
He chart-a kar ruk No.1 thei Post Malone ‘I Had Some Help’ featuring Morgan Wallen chu No.2-ah bawk a la awm a, he hla hi kumin May thla khan chart No.1-ah debut-in, kar ruk chhung a No.1 thei a ni.
Sabrina Carpenter-in chart top 10-ah hla pathum neiin, kar thum chhung chu a zawnin top 10-ah hian hla pathum a nei tling ta a, a No.1 album ‘Short n’ Sweet’-a hlate an nia, ‘Espresso’ chu No.3 niin, kar hnih liam taa No.2-a debut ‘Taste’ chu No.5 atangin No.6-ah a tawlh a, chart No.1 pawh lo ni tawh ‘Please Please Please’ chu No.4 atangin No.8-ah a tawlh ta bawk.
Lady Gaga leh Bruno Mars ‘Die With a Smile’ chu No.6 atangin No.4 a kai thar leh a, Billie Eilish ‘Birds of a Feather’ chu No.7 atangin No.5 a kaithar leh a, Chappell Roan ‘Good Luck, Babe!’ pawh No.8 atangin No.7 kai thar lehin, chart No.1 hlui Teddy Swims ‘Lose Control’ chu No.9-ah bawk a la awm a, ‘Lose Control’ hi chart top 10-ah kar 35 a lanna a ni tawh a, he chart top 10-a lang rei thei hla pariatna a ni pha tawh.
Hot 100 chart top 10 khartu chu chart No.1 hlui Kendrick Lamar ‘Not Like Us’ niin, No.10-ah bawk a la awm.