Shaboozey hla hit ‘A Bar Song (Tipsy)’ chu Billboard Hot 100 chart No.1 a ni a, he chart-a kar hnih a No.1-na a ni ta. He hla hi Shaboozey (a hming tak Collins Obinna Chibueze) album ‘Where I’ve Been, Isn’t Were I’m Going’ a hla kha niin, a album pawh hi June thla khan Billboard 200 chart-ah No.5 a lo kai tawh bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio & official video), radio airplay leh sales data te chu tehna pawimawh a ni. Shaboozey ‘A Bar Song (Tipsy)’ hi kar khat chhungin stream maktaduai 39 leh sales 16,000 tlingin, radio airplay pawh ngaithlatu maktaduai 77.2 a nei thei a, hei hi chart-ah a No.1 pui ta a ni.
Chart No.1 hlui Post Malone leh Morgan Wallen ‘I Had Some Help’ chu No.3 atangin No.2-ah a insawn thar leh a, he hla hi May thla laihawl atang khan a zawn lovin chart-ah kar ruk a No.1 thei a, he chart-a kar hnih No.1 tawh Kendrick Lamar ‘Not Like Us’ chu No.1 atangin No.3-ah a tawlh a, Tommy Richman ‘Million Dollar Baby’ chu No.4-ah bawk a la awm.
Sabrina Carpenter hla ‘Espresso’ pawh No.5-ah bawk a la awm a, Sabrina hla dang, he chart-a a hla No.1 kai thei hmasa ber leh awm chhun la ni ‘Please Please Please’ pawh No.6-ah bawk a la awm a, chart No.1 hlui Hozier ‘Too Sweet’ chu No.8 atangin No.7-ah a insawn leh hret a, chart No.1 hlui Teddy Swims ‘Lose Control’ chu No.10 atangin No.8 a kai thar leh ta a, chart No.2 pawh lo ni taw Benson Boone ‘Beautiful Things’ chu No.9-ah bawk a la awm.
Chart top 10 khartu chu Eminem ‘Houdini’ niin, he hla hi chart No.2 pawh lo kai tawh, mahse, top 10 atanga chhuak leh tawh a ni a, a album an tlangzarh avangin a lar thar leh a, No.18 atangin No.10 a kai thar leh ta a ni.
Shaboozey ‘A Bar Song (Tipsy)’ kar 2 a No.1 ta
Get real time updates directly on you device, subscribe now.
Prev Post
Next Post