Shah-a hovin hmarchhak CM-ten dan thar hman sawiho

Shah-a hovin hmarchhak CM-ten dan thar hman sawiho
Union Home Minister Amit Shah chuan Pathianni khan criminal law pathum – BNS, BNSS leh BSA te hmarchhaka hman dan thlirin chief minister leh DGP te a sawipui.
President’s Rule hnuaia awm mek Manipur atangin Governor Ajay Kumar Bhalla a tel bawk.
“Union Home Minister Pu Amit Shah-a’n Guwahati-ah hmarchhak state-a chief minister-te chu criminal law thar chungchangah a thutkhawmpui mek,” tiin Assam chief minister pisa chuan X-ah an tar lang.
Thutkhawmah hian chief minister pasarih telin state pangaa DGP an tel bawk a. Mizoram, Arunachal Pradesh leh Manipur DGP-te an tel lo thung a. Chief secretary eng emaw zat an tel bawk.
State pariatte chuan union home minister hmaah hian Bharatiya Nagarik Suraksha Sanhita, Bharatiya Nyaya Sanhita leh Bharatiya Sakshya Adhiniyam an kalpui dan theuh an sawi hlawm.
Conference-ah hian dan thar pathum hnuaia kal dan hrang hranga police, lung in, court, inhremna, forensic leh thil dang inkaihhnawih dan thlir a ni tih thuneituten an sawi.
Shah hian thu a sawi a, ‘New Criminal Laws: Standard Operating Procedures & Rules’ tih lehkhabu, Assam CID-in an siam leh Assam sorkarin a tihchhuah chu a tlangzarh bawk.
Bureau of Police Research & Development Director General Rajeev Kumar Sharma-a’n hmarchhaka dan hman mek kalpui dan a khaikhawm a. Home minister leh hotu lian dangte hnenah hian dan pathumte chak zawka bawhzui dan tura rawtna awmte a tar lang bawk.
Assam Chief Minister Himanta Biswa Sarma, Meghalaya Chief Minister Conrad K Sangma, Nagaland atangin Neiphiu Rio, Arunachal Pradesh atangin Pema Khandu, Tripura Chief Minister Manik Saha, Mizoram atangin Lalduhoma leh Sikkim atangin Prem Singh Tamang te bakah sorkar mi pawimawh te an tel.
Sorkar laipui atangin Intelligence Bureau Director Tapan Kumar Deka-a hovin mi pawimawh tak tak an tel bawk.