Shah biak hnuah Biren an sawi nei

Manipur Chief Minister N. Biren Singh chuan Union Home Minister Amit Shah nena an inbiak hnuah Centre chuan Kuki insurgent group te nena Suspension of Operations (SoO) an ziah chu a taka kalpui ngei an tum tia a hrilh thu a sawi a.
He inremna hmang hian insurgent group te chu an awmna tura tih designated camp-ah an ralthuam te kalhsaka awm tur an ni a. Chief Minister Biren Singh chuan Kuki insurgent group te chuan SoO pact rules bawhchhia in tharum thawhna an chawk tho a ni tiin a sawi.
“Home Minister chuan Centre chuan SoO group tena inremna an zawm ngei theih nan hma an lak tur thu sawiin kei ngei pawh valley lamah remna a awm theih nana hma la turin min ti a ni,” tiin Singh chuan Shah nena Delhi a inhmuhna an neih tukah a sawi.
Manipur-a hill district 10 atangin pathum chauh Kangkokpi, Tengoupal leh Churachandpur-ah te chauh tharum thawhna a thleng a ti bawk a.
Defence lam erawh thung chuan SoO camp te chu enfiah reng niin ralthuam tun te pawh enfiahna an neih rengin tun hnai thla hnih chhungin ralthuam pahnih tih chauh lo chu a himin a awm vek an ti thung.
May 3-a Kuki leh Meitei community te inkara buaina chhuak avangin mi 131 velin nunna an chan phah tawh a, chenna In leh lo chhuahsan mi 60,000 vel an awm tawh a ni.
Indian army te tirh luh hialin a awm tawh a, Central Armed Police Force (CAPF) te chuan buffer zone tih mai hill leh valley inrina lai vel veng bawkin Manipur police commando te chu Valley bikah an awm thung.
Valley district atanga Armed Forces (Special Powers) ACT (AFPSA) hnuhkir chu harsatna siamtu niin Meitei insurgent group te chuan hmun hrang hrang atanga chetlakna neiin hei vang hian security forces te chuan civil administration puihna tel lo chuan chet lak an harsat phah hle a. Police station 92 awm atangin AFPSA hlihna district pasariha police station 19 te chu valley chhunga awm vek a ni a. Imphal Minicipality area tih chauh loa AFPSA puan hi kum 2004 atanga kalpui tawh kha a ni a. Dinhmun a that deuh hnuah April 2022 atang khan police station 15 huam chhungah hlih leh niin April 1 khan police station dang pali huam chhung atangin hlihin a awm leh a ni.
Kum 1990 chhova Kuki-Naga inbeihna vanga remna awm theih nan kum 2008 khan Manipur sorkar leh Ministry of Home Affairs (MHA) te nen Kuki insurgent group 24 vel, cadre 2,200 chuang te chuan SoS an ziak a. Kuki insurgent group te hian Kukis te tan independent land an ngiat a ni.
Meitei leh Kuki group te hian ralthuam an nei ve ve a. May 3 a ethnic violence chhuah hnuah khan Police armoury atangin ralthuam 4,000 chuang ruk chhuahin a awm a ni.
SoO group te chu enfiah mai theih an nih laiin valley-based insurgent te erawh Myanmar atanga Manipur lutte chu finfiah har em em an ni thung a. June 22 khan Imphal West-a N Bijiang-ah inkahna thlengin Assam Rifles tena an beih let hnuah Imphal lamah an tlanchhia a, chung mite chu sipaite tan civil administration puihna tel lo chuan man ngaihna a awm lo tia sawi a ni.
June 19 khan dan pawna hnawl insurgent group United National Liberation Front mi leh sa palite chu Army ten Thoubal-ah an man a, mahse, Manipuri hmeichhia tena lungawilohna an kalpui avangin chhuah zalen loh theih lohin an awm zui a ni. May 24 pawh khan Manipuri hmeichhia 1,200 rual tena Imphal East security forces te an hual hnuah extremist mi leh sa Army te man 12 te chu chhuah zalenin an awm phah tawh bawk a.
Chung mite lakah chuan sipai ten silai an hmeh puah chuan nunna chan mai tur an awm a. |henkhatah chuan police-te ngei pawh inhnamhnawiha puhin an awm a. AFPSA puan ni se chuan hetiang buaina lakah hian a fihlim theih a ni tia sawi a ni.
Manipur sorkar erawh chuan AFPSA puan zui leh tumna a nei lo thung a, ngaihtuahna pawh a seng lo tia sawi a ni a. “Mipui nawlpuite chet lakna a ni a, helna kaihhnawih thil a ni lo va. Security forces te duh tawkin an chetna a dal lo,” tiin official pakhat chuan a sawi.
Defence lam mite erawh chuan kan duh leh remtih huna operation pawh nei thei lova kan awm a nih chuan engtiangin nge Manipur-ah boruak muanawm siam thei tura min beisei tehlul tiin a sawi ve thung.
AFPSA hian armed forces leh CAPF te chu ‘disturbed areas’ tia puan chhungah mi kahhlum theihna te, phalna pawh lak hmasak ngai lova mi man leh dap theihna te bakah chetlak danah khin theih miah lohna tura danin a vial chiat an ni.