Shakira & Burna Boy ‘Dai Dai’ music video-ah Messi leh Mbappe an inlan
Shakira & Burna Boy ‘Dai Dai’ music video-ah Messi leh Mbappe an inlan
2026 FIFA World Cup official theme song Shakira le Burna Boy “Dai Dai” chu Inrinni kalta khan a music video an tichhuak ta a, football star an inlan nual a, chung zingah chuan Messi leh Mbappe te pawh an tel.
He hla minute li vel sei video-ah hian tunlai footballer zinga hriathlawh ber ber te inlanin, Lionel Messi, Lylian Mbappe leh Erling Haaland te chu a music video a rawn lang hmasa berah tangin, field-ah lutin, “We are ready” (kan inpeih e) an ti a.
He video hi Miami a shot niin, Hannah Lux Davis direct niin, Shakira chu Mexico City a hmun hmingthang Angel of Independence chhipah awmin, chumi hnuah thlaler landscape-ah African naupang te nen an lam leh ziai ziai a.
Chumi hnuah Burna Boy ama verse-ah a rawn lang ve leh a, Shakira chu globe tle deuh sût chungah a dingin, chunglamah arsi a phe deuh sep sep bawk. A hnuah Shakira chu football stadium-ah hmeichhe lamthiam rualte nen inlanin, kumin World Cup khel tur ram hrang hrang flag entirna thawmhnaw an inbel bawk.
A video-ah hian Shakira-i’n football legend te hming a lamchhuah laiin World Cup match hlui clip te pawh an tilang a, he hlaa hming lang zingah hian Diego Maradona, Paolo Maldini, Romário, Cristiano Ronaldo, David Beckham, Kaká leh Lionel Messi te pawh a tel a, kumina tel tur ram Brazil, Argentina, Colombia, USA leh Netherlands te hming pawh kumin World Cup khel tur ram hming lam chhuah zingah a tel bawk.
“Dai Dai” hi Shakira-i’n official FIFA World Cup song a sak tum hnihna niin, 2010 World Cup, South Africa-in an thlen tum khan “Waka Waka (This Time for Africa)” hit takin a lo thlawh tawh bawk.
2026 FIFA World Cup hi June ni 11 atangin an tan dawn a, Estadio Azteca, Mexico City-ah opening match neiin, July ni 19-ah MetLife Stadium, New Jersey-ah final match an khel dawn a, final match khelhna tur hi he tournament atan hian a hming thlakin New York New Jersey Stadium an ti dawn nghe nghe a ni.
Kumin World Cup hi North America ram pathum- USA, Mexico leh Canada ten inthlen tawmin, kumin hian a FIFA World Cup-a a vawi khat nan final-ah half time show a awm dawn a, he show-ah hian Shakira, Madonna leh BTS te an inlan dawn a ni.