Shanghai-a Indian hren vangin China lakah India lawm lo

India chuan Zirtawpnia Shanghai thlawhna tumhmuna Arunachal Pradesh hmeichhia, a Indian passport an pawmsak loh avangin hren a nih chungchangah Beijing hnenah a lungawi lohna na takin a thlen.
Hmeichhia hi Prema Wangjom Thongdok-i nia insawi niin Shanghai tumhmunah hian immigration thuneituten darkar 18 chuang an hreng nia insawiin Chinese passport dil turin an ti niin a insawi.
“Shanghai tumhmunah November 21, 2025 khan darkar 18 chuang China immigration leh China Eastern Airlines ten min hreng a, ka Indian passport chu hman theih loh nia sawiin ka pianna hmun, Arunachal Pradesh chu Chinese ram niin an sawi a ni,” tiin X-ah a tar lang.
Amah hi United Kingdom-a cheng niin Japan-a chawlh hmang tura a kal, Shanghai-a darkar thum chawl kawi a ni a. Thongdok-i hian Japanese visa a nei a; mahse, China Eastern Airlines-a chuan phalsak a ni lo va, Indian thuneitute an inrawlh hnuah an chhuah chauh niin a insawi.
India hian Chinese-ten an ram anga Arunachal Pradesh an sawi thin chu an duh lo hle a, hmarchhak state hi a ram chhung ngei a ni tih an sawi thin.
“Ka zawh fiaha sawi fiah ka tum pawhin, ‘Arunachal hi India a ni lo,’ an ti a, an nui a, ‘Chinese passport dil rawh, Indian i ni lo, Chinese i ni,’ min ti a ni,” tiin news agency ANI-in an biaknaah a sawi.
Thongdok-i hi UK-a kum 14 vel cheng tawh niin Shanghai hi kum liam taah pawh buaina awm lova a kal pel mai thu a sawi.
Indian foreign ministry chuan Beijing leh Delhi-a Chinese thuneitute hnenah he thil thlen ni vek khan an lungawi lohna hi an thlen nghal a. Shanghai-a Indian consulate pawhin a hmunah hian inrawlhin Thangdok-i hi a chhuah theih nan an pui tih Thawhtannia sorkar thuchhuahah tar lan a ni.
“Passenger hi chhan awm ang lo taka hren a ni a, Arunachal Pradesh hi hnial theih lovin India ram chin niin a mi chengte pawh Indian passport-in an zin thei,” tiin hma latu zinga mi pakhat chuan a sawi.
Indian thuneitute hian Chinese-te chet dan chu Chicago leh Montreal Convention-in civil aviation chungchanga thu a tihtluk an palzut niin a sawi a. Hetih rual hian ram pahnihte hian thil a pangngai leh thei nan hma an la nghal tih a sawi bawk.
Tun hnaiah China hian Arunachal Pradesh-a hmun thenkhat hmingte thlakin a ram chhungah a rin lut a, hei hi India chuan duh lovin ram pahnih inkara inmil lohna siamtu ber pakhat a ni.