Share of taxes punna hi a sum ang chuan a tam ang – Chief minister

2026- 2031 sawrkar kum chhung, 16th Finance Commission rawtna hnuaia Mizoram state-in share of taxes a dawn tur chu a percent ang zawngin lang tam lo mah se, a sum hrawm a len avangin a sumfai ang chuan a tam tham viau dawn tih chief minister Lalduhoma chuan a sawi.
Union Budget 2026- 2027 pharh taka Mizoram-in chhiah hrang hrang atanga central atanga sum a dawn tur chungchangah finance changtu chief minister chuan, 16th Finance Commission-in Mizoram a rawn tlawh tuma horizontal devolution criteria leh weightage atana an rawtna zaa 80 vel dawn a pawmsak tih a hmuh theih tih a sawi.
Horizontal devolution-a Mizoram chan tur (share) hi 15th Finance Commission-ah 0.5% a nih laiin, 16th FC ah chuan 0.564% ah an tisang a. 16th FC hun chhung, financial year 2026- 2031 a kan share of taxes dawn tur chu a pung dawn tihna a ni tih a sawi.
“Kan chan tur zat pung hi a percent ang zawngin lang tam lo mah se, a sum hrawm a len avangin a sumfai ang chuan a tam tham viau ang. Kumtina kan sum hmuh tur hi a hma aiin vaibelchhe 1500 velin a sang tawh zawk dawn a. Finance Commission formula hmanga allocation siam schemes, SASCI leh a dangah pawh kan chanpual a tam phah thei dawn. North-East states zinga horizontal devolution share pung state tlemte zinga kan tel hi a lawmawm hle,” a ti.
Village council leh local council nei kan nih avangin Rural Local Body Grant leh Urban Local Body Grant hi an tihtawp mai an hlau hle a, kaltir chhunzawm zel tura an ngen angin hei pawh hi an awmtir zui tih a sawi.
16th Finance Commission-in an rawtna a pawmpui ngei theihnan an bawhzui nasa hle tih chief minister hian a sawi a. “Mizoram an rawn tlawh tum khan kan tang tlang hle a. Min rawn tlawh hnuah pawh Delhi lamah ka meeting-pui leh a ni. An hnena kan thehluh tak memorandum, felfai leh zahawm tak buatsaihtu kan Finance official-te chungah kan lawm a ni,” a ti a. A bikin Finance addl. secretary Pu Lalhmingmawia, MFAS leh a team-in an hahpui zual a, an chungah lawmthu a sawi tih a sawi a ni.