SHC-a thlan tharte lakuh an ni Sawrkar dintute insiamrem fel
SHC-a thlan tharte lakuh an ni
Sawrkar dintute insiamrem fel
Sinlung Hills Council 2024 inthlan neih zawh taka thlantlinte chu Thawhtanni khan Aizawl DC Pisapui Hall-ah rinawmna thutiam la in lakluh an ni a. Sitting hmasa ber nei nghalin, chairman, deputy chairman, chief executive member, executive Council member pali leh nominated member pahnih thlan nghal an ni.
Sinlung Hills Council secretary K Vanlalruati chuan lakluh inkhawm hi a kaihruai a. Mizoram sawrkarin thuneihna a pek angin Aizawl district election officer, bawrhsap Er. Lalhriatpui chuan pro-tem chairman thlan dan tur, Sinlung Hills Council Act 2018 Sec-13(1) in a tarlan sawifiahin, he dan tlawhchhan hian pro-tem chairman thlan zui a ni. Elected member 12 zing atangin lungrual takin Ratu bial atanga thlantlin Lalhmingthanga chu pro-tem chairman a thlan a ni a. Bawrhsap hnen atangin rinawmna thutiam a la nghal.
SHC Act 2018 Sec 13(2) sawi angin, pro-tem chairman hian elected member zawng zawng rinawmna thutiam a laktir a. SHC Act 2018 Sec 5(2) sawi angin, pro-tem chairman hian chairman thlang turin elected member-te atangin nomination a ko a, chuhtu neiloin Tinghmun bial atanga thlantlin R Lalfakzuala chu SHC 2024 chairman atan tlinga puan a ni.
Chief executive member thlan a nih bakah SHC Act 2018 Sec 5 (3) tarlan angin, elected member 4 chu executive member-a ruat an ni a. SHC Act 2018 Sec 5 (1) sawi angin nominated member pahnih ruat an ni.
Thutiam lakna inkhawmah hian MNF president Zoramthanga hoin party hruaitute bakah member lakluh chhungkhatte leh sawmbik an tel a. MNF party chuan thuchhuah siamin, SHC inthlana thlantlinten tluang taka sawrkarna siam a, sawrkar thar din a ni ta chu lawmawm a tiin, MNF leh HPC(R) thawhdunna hnuaiah hmasawnna tha tak thlen tur leh, Council huamchhung mipui hamthatna tura theihtawp chhuah a, thawk zel turin duhsakna a hlan tih a sawi a ni.
Sinlung Hills Council hruaitu thar, an bial leh party
Chairman R Lalfakzuala (Tinghmun, MNF)
Dy. Chairman Benjamin Lalrawnliana (Zohmun, MNF)
CEM Ricky Lalremsanga (Vanbawng, MNF)
EM Melody Lalchhuangzeli (Sakawrdai North, IND/HPC-R)
Lalhmingthanga (Ratu, MNF)
Zokhumthanga (Saiphai, MNF)
Lalhriatchhunga Hmar (Sakawrdai South, IND/HPC-R)
Nominated members: C Lalnuntlanga (New Vervek)
Ramfangzauva (Sakawrdai)