SHC inthlanah MNF tling tam ber
Sinlung Hills Council inthlanpui vawi hnihna, November 5-a vote thlakah MNF party chuan seat la tam berin sawrkarna a siam thei dawn. New Vervek bial bikah vote chhiar danah thil tih fuh loh a awm avangin tum thum vote chhiar nawn a nih hnu ah Aizawlah chhiar that leh a ni.
Sinlung Hills Council (SHC) hnuaiah hian bial 12 a awm a. MNF/HPC (R) in seat 7 la in, ZPM/ HPC in seat 4 an la a, INC-in seat khat an la.
Thudawn danin, New Vervek biala vote tla chhiar hmasak berah MNF candidate-in vote 392 hmu in, ZPM candidate-in vote 391 a hmu a. Vote khat chauha inthlau hi ZPM lamin chhiar nawn dilna an thehlut a ni. Vote hi chhiar nawn a ni a, chhiar hmasakah khan ballot paper thi (invalid vote) chhiar tel a ni tih sawi a ni a. Tum hnih chhiar nawnah erawh ZPM candidate a tling ve ve thung.
MNF party lamin complaint an thehlut ve thung a. Hetihlai hian State Election Commission ruahman angin vote tla hi Aizawla chhiar tura tih a ni a. Thawhlehni zan atangin Nilainia Aizawla ballot box phurh tum thleng hian mipui leh police lam an innawr buai a ni.
Aizawla chhiar nawn lehnaah ZPM candidate bawk hi vote hmu tam berin tlinga puan a ni.
MNF Tuivawl North Block chuan result puan a nih hmaa thuchhuah an siamah, vote chhiar chungchangah mipui hriata round tin puan tur a nih laiin, New Vervek biala puan a ni lo chu an hrethiam lo tih a sawi. ‘New Vervek postal ballot-in vote chhiarna hmun darkar thuma a thleng tlai bik leh, hemi chhung zawnga ballot box hi booth level officer, ZPM official candidate fanu-in amah chauha hemi hun chhung a lo awmpui hi kan hrethiam thei lo,’ a ti.
Tum thum vote chhiar nawnah vote tla zat a danglam vek a. Vote tla zawng zawng leh candidate ho total vote a inmil lo vek bawk nia sawiin, New Vervek bialah hian inthlan thar an phut tih an sawi a ni.
-- Advertisement --
1-Khawlian Lalrawngbawla INC
2-Phuaibuang Vanlalsiamsanga ZPM
3-Suangpuilawn Lalvenhima Hmar ZPM
4-Vanbawng Ricky Lalremsanga MNF
5-Ratu Lalhmingthanga MNF
6-New Vervek Lalhlunchhunga ZPM
7-Sakawrdai South Lalhriatchhunga Hmar IND (MNF/HPC R)
8-Sakawrdai North Melody Lalchhuangzeli IND (MNF/HPC R)
9-Zohmun Benjamin Lalrawnliana MNF
10-Tinghmun R Lalfakzuala MNF
11 – Saipum Lalrawngbawla ZPM
12 – Saiphai Zokhumthanga MNF