SHG ho sum eiruk vangin kum 4 lung in tang dawn

Self help group ding tak tak leh a lem siamchawp hminga loan pekchhuah atanga lo eitu then thintu mi pahnih chu thiam loh chantir an nih hnu ah court-in kum 4 lung in tang tur leh cheng nuai 10 ve ve chawi turin a hrem.
Tarlan tawh angin, State Bank of India Mission Veng Branch Aizawla branch manager thin Lalkhomang Guite leh a thurualpui Sacred Heart Society neitu Gary T Haokip bakah midang thenkhat chu self help group 15 vel, a tam zawk chu ding tak takte chu an hminga loan tih puiin, an lak tur zat atangin a tam zawk, a then chu cheng nuai 4-te an eiruk sak a, loan nuai 5 mana nuai pek tlin loh te pawh an nei. SHG thenkhat hi phuahchawp a ni nghe nghe.
Central Bureau of Investigation-in a chhuinaah an thurualpui ni ngeia ngaih mi pahnih chu court-in an inhnamhnawih ngei tih finfiahna tha tawk a hmuh loh avangin thiam loh a chantir loa, pakhat chu thubuai ngaihtuah a nih laiin a thi a, ngaihtuah tel zui a ni lo.
A bul tumtu ber nia hriat pahnih hi court-in thiam loh chantir turin finfiahna tha tawk a nei tih sawiin, June 28 khan Prevention of Corruption Act special judge chuan thiam loh a lo chantir tawh a. July 1 khan a hremna tur hi puangin, an pahnih hian kum 4 chhung ve ve lung in tang tur leh cheng nuai 10 ve ve chawi turin a hrem a. An sum chawi tur hi an pe thei lo a nih chuan kum hnih dang lung in tanin an tlak thei ang. Hemi thubuaia lung in an lo tan tawhna erawh an tan hun chhungah hian chhiar tel tur a ni.
PC Act court chuan hremna a pek nat chhan sawiin, sum khawih chingpen zah hi a tam a; ngampa takin chinchang hre lo zawkte hmangin sumpai an tichingpen a, midang tan bakah anmahni rilru insiamthatna atan hremna na zawk pek tul a ti a ni. Sum chawitir tur zah tuknaah hian PrC Act 1988 hnuaia section 16-in an sum khawih chingpen hisap tur a tih chu ngaihtuah tel a ni tih a sawi bawk.