SHRC-ah state dang nen intawm a tha zawk em tih zirchiang mek

State Human Rights Commission din tum a hma lak meknaah Mizoram sawrkar chuan harsatna a tawk loa, chutihrualin state dang nen intawm – Joint Commission neih a tha zawk em, tih an zirchiang tel mek tih sawi a ni.
General Administration Department hotute sawi danin, Mizoram State Human Rights Commission (SHRC) din tur hian hriattirna tihchhuah a ni tawh a, thawktu tur hrang hrang post siamna tur pawh tichhuak tawhin, chairperson leh member atana ruat tur thlangtu/ zawngtu tur Committee din a ni tawh a ni.
Tun thlengin hmalaknaah hian harsatna awm loin an la ti chho thei zel a. Chutihlaiiin, SHRC hian a nih dan tur anga hna a thawh (function) theihnan chairperson leh member bakah officers leh staff dang dah leh a thar lak a ngai dawn a, an hlawh lakna leh office inenkawlna tur – head of account a thar veka siam a ngai a. Office building leh accomodation leh tul dang mamawh a la awm nual avangin, state dangte nen Joint Commission neih a tha zawk em, tih pawh zirchian tel mek a ni tih GAD hotute hian an sawi.