Si hnih chhuah zet chunga chak Barca

Si hnih chhuah zet chunga chak Barca
Inrinni zan Estadio Ciudad de Valencia inkhelah a hmuna mipui 23,415 pungkhawmte’n first half chhungin Levante goal hnih lut lawm mup mup mah se defending La Liga champion nge nge chu an lo la hriat a, second half-ah Barcelona lamin beiletin, goal thum an tilut a, 3-2 hnehna nen nui hnuhnung zawkah Catalan-ho an tang!
Kha inkhelah khan Marcus Rashford chuan Barcelona tan a full debut nghakchhuak mah se half-time laiin midangin an thlak a, second half-ah hmuh tur a awm zui lo.
He on-loan Manchester United forward hi tlar hma veilamah tlantir niin, Raphinha chu a laiah ni siin Ferran Torres hnungah a ding a; dinglam sirah Lamine Yamal chuan tan a khawh thung a; minute 45 hmasa zawk chhungin Niu Camp tlarhma hi an talbuai tluanchhuak a tih theih!
First half chhung hian Barca lam hi an khel chhe ve hrim hrim a; tan atanga minute 15-na lekah Ivan Romero chuan Levante hmahruaina goal khungin, Barcelona siphurh sut tum beilet tan Torres chuan goal kham a chhuihper nghing lawih a; mahse, mualneitu team lam bawkin first-half hun pekbelh tawp dawn minute sarihna kal mek laiin an goal hnihna an hlawhchhuak leh ta zawk!
He goal hi penalty atanga chhuihluh niin, Alejandro Balde chuan shot a danna lamah a kutin ball a tawk fuh niin video assistant referee-in a hmu a, referee Alejandro Hernandez Hernandez chuan a va endik hnuah penalty hamin, Jose Luis Morales lo penchhuak chuan sihnih faia Levante hmahruaina a chhuihlut er zawk!
Barcelona boss-in half time laiin Rashford leh Marc Casado a chawlhtir a, an aiah Dani Olmo leh Gavi-te chuan second half bul an tan a, second half tan atanga minute riat chhungin Catalan team hian an siphurh pahnih an sut zo hman der!
Minute 49-ah Pedri chuan pui takin Barca goal khatna a chhuihlut a, minute 52-ah Torres chuan mikhual siphurh sut zoin, team pahnih hian goal an thun chhunzawm thei ta lo ve ve a, inhnehtawk thei mai dawna an lan hnu hun pekbelh tir lamah Levante player Unai Elgezabal chuan Yamal-a cross tha zet chu an lam goal-ah a tilut palh a, hei hi Barcelona chuan point thum hmuhna’n an hmang zui ta a ni.
He inkhelah hian Barcelona chuan season liamtaa an away shirt kha an ha a, hei hi a chhan chu La Liga rules-in a phut vang niin, season thar atana an thuam palite chu Levante home shirt nen inzulna nei a nih avangin an hak chhuah a rem lo fai vek a, kum hluia mi an phawrh leh rih a ngaih phah ta a ni.
Hansi Flick-a team Barca hian tun kartawpah pawh home chang loin Rayo Vallecano an luhkhung leh ang.
Spanish La Liga karliamta inkhelah hian Zirtawpni zanah Real Betis chuan sikhat faiin an mikhual Alaves an hneh a; Inrinni zanah goal khat ve ve khungin mualneitu Mallorca leh Celta Vigo an in draw a; chuti zat chiah chuan Atletico de Madrid leh an mikhual Elche an inthathen ve bawk.
Hansi Flick-a team Barca chuan tun kartawpah pawh home chang loin Rayo Vallecano an luhkhung leh ang.