Siamtu ngaih pawimawh hmasak ‘environment’

Pathianin lei leh van a siam khan, mihringte mamawh tur environment hrang hrang kha ni ruk chhung ngawt a siam phawt a; a ni rukna tawp lamah mihring a siam ve chauh a nih kha. Heta tang hian environment pawimawhzia a lo lang nghal mai awm e.
Khawvel ngaihsan hlawh India scientist, a hnua president ni zui ta, Dr APJ Abdul Kalam khan, president a nih hma lawk thla thum velah khan environment pawimawhzia phochhuahna article pakhat, “A letter written in the year 2070” tih kha a ziak a. Hei hi Bolivia rama magazine pakhat “Crónica de los Tiempos” ah April 2002 khan tihchhuah a ni a. A hnuah zirlaite educational material atan powerpoint presentation siam a ni a, khawvelah a lar hle a nih kha.
Kha lehkhathawn advance zet-ah khan, lehkhathawn ziaktu kum 50 mi chuan, duhtawka tui in tur a awm tak loh avanga kal natna avanga thi thuai tawh tur a nih thu te, mihring dam lai zinga upa ber pawl a nih thu leh, kum 85 mi ang maia tar hmel pu tawh a nih thu te, mihring dam rei zawng chu chawhrualin kum 35 lek a nih tawh thute a ziak a. Tunhma kha chuan ni tin tui no 8 tal in turin kan infuih thin a, tunah chuan tui tlakchhamna avangin ni khatah no khat bak in tur a awm tawh lo, tiin a ziak bawk a. Ram thenkhat, ram hring leh lui tui luang la awmnate chu sipaiin ralthuam hlauhawm pui pui nen an veng tlat a, tui chu rangkachak leh lunghlute aia hlu zawk a ni ta tiin, mihringin environment kan lo ngaihpawimawh tawk loh avanga harsatna hrang hrang thlengte a tarlang tel teuh bawk.
Vawiin hi khawvel huapa environment puala serh hran Ni – World Environment Day a ni a. He hun hi Mizoramah pawh khawvel ramdangte rualin urhsun taka hman a ni ve thin. Day kan hman lai na na na hi chuan kan la urhsun viau a, ram hruaitute pawhin thu tha pui pui an sawi thin; mahse, environment suasam zawnga shifting cultivation bansanna tur lam hawia beihpui thlakna thawm erawh hriattur a la awm lo reng chu a nih hi.
Ram thenkhatah chuan khawl hmangin thingkung an pawt phawi a, sum tam tak sengin an phur a, an compound-ah an phun thin. Keini chuan kan compound-a thingkung puitling sa chu hnawk tiin kan la kit thlu hmiah hmiah duh a. Siamtuin a ngaipawimawh hmasak environment hi mihringte hian kan ngai pawimawh ve lo a nih chuan, “A letter written in the year 2070” hi keini chuan “2050”-ah emaw, a aia hmaah pawh, kan sawn hnai mai ang tih hlauhawm tak a ni ta.
Environment ngaihpawimawh lamah hian harhtharna kan mamawh hle a ni.