Sibal-an Congress ten a lailum luah ngai ti

Congress te chuan kum 2024 inthlanpui neihnaah BJP te paihthlak an nih theihnana tangrual siamah a lailum an luah a ngai tiin Rajya Sabha MP Kapil Sibal chuan a sawi.
Sibal hi Opposition MP zinga langsar taka BJP bei ngam ber zinga rel reng niin BJP dodal leh duh lo political party tin te chuan common platform siamin an tanrual a ngai tih ngaihdan neitu a ni.
PTI tena an interview-naah Union Minister hlui chuan tun dinhmunah chuan kum 2024 atana opposition coaltion kaihruaitu tur leader la buaipui a ngai lo a ti a, kum 2004 pawh khan Atal Bihari Vajpayee sorkar chu opposition tena leader tihbik an nei lo chungin paihthlakin an awm tho a ti bawk.
Sibal chuan Congress party chu opposition coalition siamah a lailum luahtu an ni lo thei lo tia sawiin kum 2024 BJP te paihthlak an nih theih nana pawimawh a ti a.
Nationalist Congress Party (NCP) supremo Sharad Pawar an Adani Group te a thlawp thu a sawi chuan Oppotition unity a tinghing tia sawi chungchangah Sibal chua, “Issue tihzim lutuk leh thliar zim lutuk chuan political party te ngaihdan in ang lo a siam mai mai ang. Chu ai chuan platform zau zawk siama issue zim lutuk lova kalpui chuan thawhhona tha zawk a thlen thei,” tiin a sawi a.
“Rahul Gandhi-an India rama crony capitalism thlir dan a neih chuan Sharad Pawar-an crony capitalism lam platform siam a dodal dawn tihna a ni lo, mimal tinin ngaihdan leh thlir dan kan nei a ni. A pawimawh ber chu zau hek hawka thil thlir niin chu chuan Opposition inlungrual a siam thei,” tiin a sawi.
Issue tihzim a nih lutuk chuan harsatna a pung mai tia sawiin entirna a siamah dan siam tam takah ngaihdan hrang hrang a awm thu a sawi a.
“Ngaihdan inang lo nei tena an party te ngaihdan an sawi lan kan remti tur a ni. Rahul Gandhi an mimal ngaihdan a neih kan remtih a ngai a, Sharad Pawar pawhin ngaihdan a neih kan remti tur a ni. Chu chu inlungruallohna thlentuah kan hmang tur a ni lo,” tiin Sibal, UPA 1 leh 2 a Union minister ni a, nikum May thlaa Congress chhuahsantu chuan a sawi a.
Sibal hi tun hnai lawkah Samajwadi Party te thlawpin Independent member-in Rajya Sabha-ah thlan tlin a ni a, tun hnai lawkah non-electoral platform thil dik lo beih nan hman tur ‘Insaf’ tih chu a kalpui bawk.
“Opposition lungrualna chu ngaihtuah hona zau zawka kan neih leh kalpui duhnain a siam thei a ni,” tiin Sibal chuan a sawi bawk.
Sibal chuan Opposition party te chuan he ramah hian dik lo takin – social, economic leh political lamah sorkar hmalaknaa thil kalpui a thleng mek tih an hriatfiah a ngai tiin a sawi bawk a.
A platform siam thar chuan Opposition mamawh te a phuhru thei ang em tia zawhna chu Sibal chuan ‘thei mai thei’ tia sawiin mahse chu platform chu tha taka hmang thei tur chuan opposition party ten tihtur tam tak an nei tiin a sawi bawk.
Opposition party te chawrchhuahna inang lo tak tak te chu inthurualin an parliamentary seat te chu kum 2024 ah BJP te paihthlak an nih theih nan hrim hrim an kian ngam dawn mi tia zawhna pawh chhangin Sibal chuan party-te chu an thil phal a ngai tia sawiin ideology neih te insawisel tawnsak chuan min tichak lo zawk a, kan hmelmate sanna a siam zawk a ti bawk.
Budget Session neihah Lok Sabha member atanga Rahul Gandhi ban a nih hnuah opposition te an lungrual tan tia sawi chu Sibal chuan, “Hei hi pen lakna hmasa a ni a. Political party te hian thil phal zawka mi tin tena an ngaihdan an sawi lan leh chutihruala sorkar lai mek India mipuite rahbeh tum mektute beih let nan leh democracy ram autocratic a leh tum mek te beihlet nan an hman a ngai,” tiin a sawi bawk.
Sibal chuan Opposition tin te tana common minimum programme siam chu awlsam a ni lo a ti a, mahse, inthlanpui dawnah a riruang tur a lang mai ang, a ti bawk a.
Adani issue leh caste census te chu Opposition tena chakna an chan theihna tur ber a ni ang em tia zawhna pawh Sibal chuan independent member mai a nih avangin engmah thurawn pe thei a ni lo a ti thung a.
“Case census hi issue lian deuh mai a ni a, State hrang hrangah a boruak a lian a, a bik takin northern India-ah a ni bik a, national issue a siam chuan unifying factor a ni thei tho, sawi lawk har ka ti,” tiin a sawi.
Adani chungchangah Sibal chuan A, B emaw C emaw issue a ni lo, sorkar leh sumdawng lian te inthuruala resources, media, thuneihna te central agency te hmang tangkaia an thunun dan zawk a ni a ti bawk a.
Prime Minister-in Opposition te chuan a sorkarin anti-corruption crusade a kalpui an hlauh em avangin inthurual an tum a tih chu chhangletin Sibal chuan chutianga sorkarin eirukna a dodal viau a nih te chuan eng vangin nge thuneihna an chan hnua kum nga ral dawnah pawh Lokpal member tur pawh an la ruat theih si loh a ti bawk a. Tun thlengin Lokpal hman tlak lohin an siam a, sorkar mi leh sa tumah chhui chian pawh an nei thei hleinem, a ti bawk.