Sihhmui-a Sub Station siamthat dan tur enfiah

Sihhmui-a Sub Station
siamthat dan tur enfiah
132kV Sub Station Sihhmui ami chhe mek siamthat dan tur chu Nilaini khan Power & Electricity minister F Rodingliana chuan bialtu MLA TBC Lalvenchhunga nen tlawhin siamthat dan tur an sawidun.
Thawktute sawi danin, May 26 tlai dar 5.20 khan 132kV Sub Station Sihhmuia 33kV current transformer chu kang chhiain, transformer chhia hian 25MVA, 132/33kV power transformer a khawih chhia a. Hei vang hian Sihhmui Sub-Station atanga kawphetha la chhawng, Sairang Sub Station, Lengpui Sub-Station, Rawpuichhip Sub-Station, W Phaileng Sub-Station, ISPAT, PHE 37MLD water pump leh an chawm khuaah kawlphetha an hmu thei lo a ni.
P&E minister hian transformer chhia vanga harsatna sutkian thuai a nih theihnan bialtu MLA nen a hmunah an endik a. Powergrid Corporation of India Limited (PGCIL) hotute pawh a tul anga hma la tura hrilhin, Sihhmui Sub-Station bulhnaia awm, PGCIL Bay hman tangkai a, rang taka power supply pekchhuah leh dan ruahmanna siam a ni.
Ruahmanna ang chuan, Sihhmui Sub-Station bulhnaia awm, PGCIL khawl (bay) hmangin Sihhmui Sub-Station-a 25MVA transformer chhia thlakna tur power transformer thar tihnun (charge) a ni anga, transformer tihnun a nih chhung Luangmual leh Sihhmui inkar 132 kV line chu 33 kV-a tihnun a, kawlphetha lakluhnan hman lailawk tum a ni.
Kawlphetha pek dan pangngaia kalpui leh a nih hma chuan he powerline tan hian load a san deuh dawn avangin, peak load laiin load shedding siam a ngai thin tur thu thawktute chuan an sawi.