Sihhmui kaia Tlawng lei dawh kai

Kawng pawimawh, Sairang Sihhmuia Tlawng lei dawh chu Thawhtanni khan dawh kai a ni. Lengpui Airport panna, National Highway 44A/108 ni bawk, Sihhmui lei – steel arch (semi through) dawh hna hi Poddar Infractech Pvt. Ltd. Delhi-in a thawk a. 2024 December thla tir khan dawh kai turin an peih a, dawh kai tum tan a nih hnu lawkah a lei khaikangtu cable pakhat a chah avangin dawh kai theih a ni ta lo a ni.
Lei dawhtute hian thla thum tal nghah leh a ngai dawn tih an sawi a. Kumin April 7 atanga dawh that leh tumin an inruahman a, thuneitu lam pawhin April 6 atang khan helam kawng hi kal theih loh turin an khar a, April 8 thleng khar turin thupek chhuah a ni.
Lei dawh kai hma hian a dawhtu Poddar Company hian tawngtaia hlan hmasak an duh a. Hemi chungchang thu hi he lei dawhkai tur hi ngaihven a hlawh zual tir hle tih sawi a ni.
Company lamin hun hmang tura Mizoram PWD kaltlanga an sawm hi Lengpui Presbyterian Kohhran bialtu pastor Rev. Lalchungnunga Hauhnar a ni a. Pastor hian social media lamah tawngtaipui tura dilna tichhuakin, April 7-a lei dawh turah tawngtaia hlan tura sawm a nih thu leh, tawngtaina in hlan se, lei hi an dawh kai mai an ring tih company lam hian an hrilh thu te, lei dawh hmasak zawkah Hindu sakhaw inthawina (puja) a an lo hlan tawh dan te, lei dawh kai tur a tlawlh tak avanga Kristiante Pathian hminga dawhkai theih an inrin thu te a tarlang. Hemi kaihhnawiha Isua Krita chanchintha hrilna hmanrua a nih theihnan mipui tawngtaipuina a ngen thu a sawi a. Kohhran leh mimal anga tawngtaipuitu an thahnem hle tih thu dawn a ni.
Lei hi pastor-in a hlan hnu ah Thawhtanni zing dar 7.00 vel atang khan dawh tan a ni a, an tluan chuan tlai dar 4.00 vela pawh kai theih an inrin laiin, chawhnu dar 12.50 velah a ral lehlam an pawt thleng tih sawi a ni.
Poddar Infractech hian 2021 March 21 atang khan metre 100 vela sei lei dawh hi an tan a, kum hnih chhunga zawh tum ni mah se, Covid leng leh harsatna dang vangin zawh hman a ni lo. Lei hi a ral lehlama remkhawm a ni a, khawl hmangin lui dunga pawh kai a ni.
‘Network inclined arch bridge’ tih a ni a, he project atan hian Ministry of Road Transport & Highways chuan cheng vaibelchhe 36.99 a ruahman a ni.