Sihphir in Chhinga Veng an lehthal

Mizoram Volleyball club te inelna lian ber Mizoram Rural Bank Pro Volleyball League 2026 chu Nilaini khan LS Arena, Falkland-ah khelh chhunzawm a ni a. Inkhel hmuhnawm takah Sihphir chuan Chhinga Veng Spikers an lehthala hnehna chhinchhiahtlak an chang.
Pro Volleyball League 2026-ah mipa inelnaa round khatna inkhel hnuhnung berah Sihphir leh Chhinga Veng Spikers te an inhnehtawk viau a, set an inlakchhawk zak zak. Set hnih hloh hmasa zawkah tang bawk mah se hun pawimawhah Sihphir an chetha a, an khingpuite lehthalin hnehna hlu an chang.
Sihphir leh Chhinga Veng te hi an inhnehtawk viau a, set khatnaah an deuce nghal. Set la thei dinhmunah ding mah se Sihphir an chesual zawn thung a, uiawm takin set khatna an hloh a, hnufual zawk an ni hmasa.
Set hloh hmasa zawkah tan mah se Sihphir in huai takin an khingpuite an bei let a, set hnihnaah point 8 zeta chungnungin set an la let. Set khat ve ve an lak hnuin inkhel a hmuhnawm zui viau a, set thumnaah an intum tawk viau chungin Chhinga Veng an chungnung nawn leh a, 2-1 in hma an hruai leh chiah.
An hnfual thar leh hnuin Sihphir in set lak tumin tan an khawh nasa leh zual a, set lina an la ve leh ta mai a, deciding khelh a ngai. Deciding set-ah hian Chhinga Veng Spikers in bul an tan tha a, hma an hruai deuh ngar ngar. 12-10 a hmahruaiin an chak a rinawm hman viau nghe nghe. Hnufual zawk ni reng mah se Sihphir an zam lova, huai takin an khingpuite hmachhawn tluanin an lehthal ta hial a. Chhina Veng Spikers lakah hian Point 24-26, 25-17, 22-25, 25-21 leh 15-12 in hnehna an chang zui ta a ni.
Chhinga Veng Spikers an lehthal tum hian Sihphir tan Niyas Abdul Salam a khel tha viau a, point 36 a thawkchhuak. Point 36 a thawhchhuah laiin point 20 zet a hloh tel tho naa ‘Kuriz Player of the Match’ ah thlan a ni.
Pro Volleyball League-a season hnih an telnaah Sihphir an danglam hle. 2025-ah kai thar ni chungin uiawm takin semi-final an lut pha lo chiah. 2026 ah erawh an khelh hmasak ber atangin el tham an ni tih an lantir a, a chhe berah knockout round luh ngei a tumna tihlawhtling thei turin an chak nghal.
Sihphir coach hi Lalhmingliani Sailo a ni a. Ani hi hmeichhe zinga Pro Volleyball mipa team enkawl hmasa ber leh chakpui hmasa ber a ni kawp a, hnuhma duhawm tak pahnih a hnutchhiah.
Kum khat an awl hnua Pro Volleyball-a a kir leh, Pro Volleyball League 2019 champion Chhinga Veng Spiker in khawmualpui hran atangin Cuban player Morales Ponce De Leon an la lut a, boruak pawh an siam hle. Mizoram volleyball inelna sang bera a inkhelh vawi khatnaah Morales a nghet lo va, a ball vuak an dansak fo bakah team tiphur turin a che vel hrim hrim a ngampa tawk lo.Beiseina sang tak nena an thlir Morales hi a insiamthat thuai a beiseiawm.
Pro Volleyball League 2026 hi zanin dar 8:00 ah khelh chhunzawm a ni ang a, TNT leh Tuichangral te an intum ang.