Sikkim tuilian thutah chin hriatloh 43 awm
Sikkim hmar lama Lhonak Lake lian thut chuan Lachen valley a Teesta river ah tuilian nasa tak thlenin Singtam, Bardang bula Army mi leh sa 23 te pawh chin hriat lohin an awm phah niin Defence thupuangtu chuan a sawi.
Chungthang dam atanga tui chhuah chuan hnuai lamah tui chim chin 15-20 feet velin a ti sâng bawk nia sawi a ni a. “Hei vang hian Singtam, Bardang bul hnaia Army vehicles dah te chu tibuai tain tuiina chim avangin Army personnel 23 te chu an chin hriat lohin an awm zui a ni,” tiin Army thuchhuah chuan a tarlang.
Chief Minister PS Tamang chuan Singtam hi tlawh nghalin tuilianin a tihchhiatte a enfiah zui nghal a, senior officials te chu thil awm dan enfiah zui reng turin a ti bawk a.
Pakyong, Gangtok, Namchi leh Mangan district a sorkar leh private school tin te chu October 8, 2023 thlengin khar tura tih a ni zui nghal bawk.
Rangpo-ah pawh mi 3,000-4,000 inkar vel chu hmun hima thiarin relief camp 5 siamchawpah dah an ni zui a. Tuilian thut hian Rangpo Industrial belt (IBM)-a chenna in 150 vel a tichhia nia sawi a ni bawk.
Tuilianin a len ruang pakhat tu tih hriat loh chu chhar a ni bawk a. IBM area-a in tin te chu chhawng hnih thlengin tuiin a chim vek niin official-te chuan an sawi bawk.
Sipai leh civilian tuilian kaihhnawiha an chin hriat loha awm mek chu 43 an ni a. Sikkim District Magistrate Tashi Chopel chuan, “Tuilian thut avang hian building leh vechile tihchhiat a ngah hle a. Nunna chan an awm bawk a, mi 20 an chin hriat lohin an awm mek,” tiin a sawi bawk.
Chhanchhuah hna thawk turin National Disaster Response Force (NDRF) te chuan team thum an tir lut nghal niin official-te chuan an sawi bawk a, team khat chu Gangtok-ah dahin a dang pahnihte chu thenawm West Bengal hnaihah an dah thu an tarlang bawk a ni.
Tuilian avang hian Sikkim-a inbun company te chuan hna an chhunzawm thei lo va. Alembic Pharmaceutical te pawhin Teesta River lian avangin Sikkim-a an manufacturing plant te chu an khar rih thu an sawi nghal bawk.
Hetih lai hian India Meteorological Department chuan Sub-Himalayan West Bengal leh Sikkim-ah te October 4 atanga October 6 chhungin ruahsur nasa tak la thleng thei turah an ngaih thu an tarlang bawk.