Khawchin tur hriat lawk vek si a, sawrkarin chawpchilh taka sikul chawlh a puang chu sikul tam tam buaina tizualtu niin zawm enah an en lo hial zawk tih MNF party chuan an sawi.
MNF Gen. Hqrs. thuchhuak chuan, khawchin thlirtute puan lawk angin ni thum vel ruahin min chenchilh a, zankhuain chawl loin a sur a, leimin avanga in chim, nunna chan leh mangang authawm, kawng kaltlang theih loh thawmin min chim a. A hmaa inbuatsaihna awm thei reng karah naupangten ruahsur kara school an pan vek tawh hnuah sikul chawlh puan leh hnuhnawh a ni tih sawiin, ‘Sikul tam takin sawrkar thuchhuah chu an buaina tizualtu ah ngaiin, zawm enah an en lo hial zawk a. Hetianga rorelna fello hi kan ramah a la thleng ngai loa, an enkawl mipui zahlohna leh mahni chauh inngaihtuah sawrkar a nih zia pholangtu ah kan ngai a ni,’ a ti.
Furpui thlen lai, chhiatna in Zoram a tuam laiin, sawrkar inrenchem thupuia puanga kalpui mektute chuan a hautak thei ang berin Lunglei khawpui ngaipawimawh derin, council of minister thutkhawm an neih chilh chu thil tangkailo takah MNF chuan a ngai tih a sawi. ‘Rorelna hmun sawn aiin an thurel leh a taka kenkawhna in Lunglei leh chhimlam tan thawk zawk se a duhawm hle,’ a ti.
Hetianga rorelna fello hnuaia khawsak hi Zoram mipui beisei a ni lo a, an insawi anga thil tha tinreng tiaam thlentu tur leh thlamuanna sawrkar ni tura beisei an nih laiin, an insawi ang niloa khawsa sawrkar kan nei chu pawi a tih MNF hian sawiin, ‘Sawrkar kan hrawn mek hian mipui bei a tidawng takzet a. Mipui aiawha rorel tur, mipui sawrkar din tumtute khawsak dan hi a lungchhiatthlak a. Tui harsa leh eng hmuh that mumal awm lo kara manganna leh harsatna ruama mipui rum mekte dinhmun hi hmuh tum ve in, mipui mamawh anga khawsa turin ZPM sawrkar hi kan phut a ni,’ a ti.
Sikul chawlh thu sawrkarin a chhuah kha sikul tibuai zualtu – MNF
Get real time updates directly on you device, subscribe now.
Next Post