Silai mu vanga man pahnih Jail atangin an tlanchhuak

July 6 khan Serchhip District Jail atangin tang lai pahnih an tlanchhuak a, he chanchin buatsaih lai thleng hian man an la ni lo.
Thudawn danin, Inrinni chawhnu dar 1.45 vel khan Serchhip District Jail atangin Myanmar lam mi pahnih, kumin June 7-a Serchhip Darnam Venga AK-47 rifle mu, black market-a cheng nuai 10 man vel mansak vanga jail-a tang mek, Lalchhanhima (44) Leisen leh Lalnunnema (31) Thantlang Myanmar ve ve chu an tlanchhuak a. Inrinni chhun khan jail chhung kawtlaia volleyball court ban phun thatna hmanrua vel jail gate chhung zawk pelh, office bungraw dahnaa dahfeltu zingah Lalnunema hi a tel a. Tang vengtu be buaiin heng mi pahnih hian gate inkhar sa chu nam hawngin an tlan phut a, man bet tuma an pawt chu talputin, jail atanga khaw chhak lam ruam mau hmunah an tlan liam a, an chapal pawh an tlansan nia sawi a ni.
Serchhip bul hnai thlam hrang hranga an awm theihna awm chu Inrinni zan zankhua khan zawngkualin, kawng peng thuamahte chân an ni chungin, hmuh an la ni lo a ni.
Lalchhanhima hian AK-47 silaimu hi Myanmar-a mipui sipaite hman tura ken chhoh tum niin a lo sawi tawh a. Lalnunnema erawh silaimu chungchang leh mipui sipai tana thawhnaa inhnamhnawihna nei lo, police-in an man dawn laia a bula lo awm, an nanchin tak avanga man ve mai nia sawi a ni.