Silai puak nasa leh, nuho lungawi lo kalkhawm

Tun hnaiah Manipur-ah silai a puak nasa leh a, Zo hnahthlakte leh Meitei an inkap leh. Hmun hrang hrangah silai a puak a, hetih lai hian Lamka-ah nuho lungawi lo an pungkhawm bawk.
November ni 7 khan Jiribam district-a Zairawn khuaah Meitei-in rawng takin Zosangkim Hmar an that a, hei hian boruak a tilum leh mek. Hmun hrang hrangah an inep a, silai pawh hmun hrang hrangah a puak.
Zosangkim Hmar chunga thil thleng vanga lungawi lovin Thawhtanni khan Lamka-a Public Ground-ah Hmar Women Association huaihawtin nuho an pungkhawm a, Zo hnahthlak chi peng hrang hrang atangin hmeichhia an pungkhawm.
Thu dawn danin, sipaiin inepna hmuna kal turte an dang a, sipaite tibuai turin hmeichhia an kal a ngai bawk a, chuvangin Public Ground-ah pawh hian hmeichhia hi an thahnem thei lo zawk.
Thawhtanni khan Churachandpur district leh Bisempur district inrinna velah chuan ‘emergency shutdown’ an puang a, dawr hawn loh tur, lirthei tlan loh tur an ti.
Manipur atanga thu dawn danin, hmun hrang hrangah duty indah belh a ngai thei a, ambulance tlantir te pawh a ngai thei a, chuvangin kawngpui hi tihruah reng a ngai an ti.
Jiribam district-a Zo hnahthlakte khua a ralmuang lo a, Thawhtanni pawh khan Jakradawr khua velah an inkap. He district hi an inkah zuina a ni a, Zo hnahthlak lamah nunna chan an awm lo tih thu dawn a ni.
Churachandpur district-a khaw thenkhat, Meitei khua nena inhnaihah pawh silai an puak zui a, duty tur pawh hmun hrang hrangah an indah belh tih thu dawn a ni. New Kangvai thlang lamah Thawhtanni pawh khan an inkap tih thu dawn a ni bawk.
Kangpokpi district lamah pawh silai puak ri hriat tur a awm zeuh zeuh a, anni lam hi chu boruak a daih deuh lai pawhin an inep deuh reng tih thu dawn a ni.