Silver medal nena kum bul \an Malsawmhlua (Mama)

On Jan 12, 2026 0 0

Silver medal nena kum bul tan
Malsawmhlua (Mama)
January ni 3-10, 2026 chhunga Hyderabad-a khelh zawh tak Yonex-Sunrise All India Junior Ranking Badminton Tournament 2026-ah Malsawmhlua (Mama) s/o Albert Lalnunhlima, Serchhip P&E Veng leh a kawppui Aanayan Borah-te tagdun chuan silver medal an hlawhchhuak.
Mizoram badminton player zingah Mama hian record duhawm tak mai a nei thar a, U-15, U-17 leh U-19 category-ahte national level-a final thleng vek thei leh silver medal tal la vek thei awmchhun a ni.
Tunah hian kum 16 leh thla 4 a upa a ni a, Under-19 category hi a kum khat khelhna chiah a ni bawk.
Mama leh Aanayan-te hian seeded 5-na ni chungin tournament hi an hmachhawn a; an match hmasa berah Gauransh Gupta leh Eeshan Matharasan-te chu 21-17, 18-21, 21-19-in an hneh.
Round of 16-ah 21-17, 21-16-in Sanidhya Sunil Ekade leh Abhinav Khandari-te inkawp an hneh leh bawk.
Quarter final-ah seeded no 2 Divyansh Agrawal leh Amarjit Singh Khwairakpam tangdun chu 25-23, 17-21, 21-16-in an hneh leh bawk a ni.
Semi-final hmuhnawm takah seeded no 4 Bjorn Jaison leh Showrya Kiran J inkawp chu 21-23, 21-11, 21-15-in an hneh leh a; final-ah erawh tournament seeded no 1 Charan Ram Thippana leh Hari Krishna Veeram Reddy inkawp lakah uiawm tak 12-21, 21-23-in an tlawm a, Junior National Ranking tournament lianah silver medal an dawng ta a ni.
Junior category (badminton) bikah Mama hi Mizo zinga national medal dawng thei palina a ni a, a hmain C. Lalramsanga, Lalrempuii leh H. Lalthazualate’n an lo dawng tawh a ni.
Nikum December thlaa U-17 National Championship zawh takah khan silver medal a lo dawng tawh bawk a ni.
He badminton tournament lianah hian Vanlalhruaia Sailo (boys’ singles), Zoramthari leh H. Lalrinhlui (girls doubles) bakah H. Lalrinhlui leh a partner, state dang mite chuan qualifying round atanga bul tanin main draw an invawkai a; Sainunmawia Sailo leh a kawppuiin main draw lutin, dinhmun sang an luah thei bawk.
Mizoram Badminton Association chuan Malsawmhlua hi a lawmpuiin, a chhuang takzet tih thuchhuah siamin an tarlang a, hei aia sang zawk thleng chho zel thei turin duhsakna sang ber a hlan nghal bawk.