Sinlung Council sum hman danah mipui lungawi kim lo – Lalnghinglova Hmar

Sinlung Council sum hman
danah mipui lungawi kim lo
– Lalnghinglova Hmar
Sinlung Hills Council sum hman a nih danah a huamchhunga mipui an lungawi kim lo nia a lan thu minister Lalnghinglova Hmar chuan sawiin, an party-in sawrkarna a chan chuan langtlang taka sum an hman tur thu a sawi.
Sinlung Hills Council (SHC) inthlan neih tura campaign minister hian campaign-a a kal kualnaah Council sum hman danah mipui an lungawi kim loa, langtlang taka thil kalpui loha hnathawhna sum awm zat pawh mipuiin an hriat loh thu an lo hrilh tih a sawi. Council sum chu beitham deuhin lang mah se, dik taka hman chuan hmasawnna thlen thei a ni, tiin, ZPM-in sawrkarna a chan chuan a dik thei ang bera sum an hman tur thu a sawi.
“Tihhlawhtlin theih loh tur thil lian pui pui tiam ka tum loa, kan theihna chinah tun ang ringawt lo deuh hian kan kalpui ngei ang. He Council huamchhung amiten hmasawnna thlen phak lohna ram anga an inngai reng hi a fel lo takzet a ni,” a ti.
Politics chu ram siamna hmanrua a ni a, lal inchuhna ringawt anga kan ngaih chuan a tum a thelh a ni tih Lalnghinglova Hmar hian sawiin, “Ram siam tum tak tak lo tan politics chu mahni insiamna mai a ni thin. Kan theihna a sang lo a nih pawhin kan phak tawkah ram siam tumna kan neih phawt chuan SHC atang pawhin ram hi siam theih a ni a, mipui nawlpuiin mahni ram veina tak tak kan neih chuan ram hruaitute kalsual tur veng theitu kan ni, “a ti. SHC inthlanah ZPM a sawrkar a nih pawhin mipui chu hruaitu thlan tharte vengtu ni zui zel turin a chah.