Sinlung Hills inthlan turah zalen takin campaign

Sinlung Hills Council inthlan turah campaign hun a tawp ta a, tluang takin, zalen takin political party-te leh candidate-te an campaign thei.November ni 5 hi vote thlak ni tur a ni a, ni 3 tlai dar 4 khan campaign hun a tawp. Ni 3 hi Chawlhni a nih avangin hmun thenkhatah chuan party te’n Inrinni tlaiah khan campaign kharna hun an hmang.
Sinlung Hills Council-ah hian seat 12 a awm a, vote tam berna Sakawrdai North bialah chuan vote hi sang hnih dawn a awm.
He inthlan lo awm turah hian zalen takin an campaign a, MLA inthlan leh inthlan dang thenkhat aiin an phal zau. Mahse hei hian thil duhawm lo leh harsatna a thlen lo tih thu dawn a ni.
Mizoram inthlanpui ang lo takin zalen takin ruai a buatsaih theih a, khaw hrang hrangah ruai an theh. Ruai buatsaih lohna khuate chu awm tho mah se ruai hi an buatsaih fur tih candidate pakhat chuan The Aizawl Post a hrilh.
Party te’n an duh danin vantlang inkhawm an ko thei a, mahse sorkarah dil phawt a ngai. Vantlang inkhawm hi MPF lam an kaihhruaitir tlangpui nia hriat a ni.
House to house campaign pawh zalen takin an ti thei a, vengtu nei lovin candidate-te leh campaigner-te mi inah lengin an campaign thei a, hei hian thil tha lo a thlen an hriat loh thu an sawi.
Thu dawn danin, hla leh rimawi lamah pawh inkhap emaw inkhuahkhirh emaw a awm lo a, hei hi party-te campaign dan pawimawh ber pakhat pawh a ni. Campaign office-ah pawh mahni party hla an ‘play’ a, a duh chu an lam mai.
‘Flag war’ pawh a awm a, lirthei hrang hrangin an tar a, inah pawh an tar sup sup. Kawngzawh inkhap a awm lo na a, kawngzawh tak hi chu a awm lo nia hriat a ni. Amaherawhchu, lirthei tam tham vak lo inzuia tlan kual chu an awm thin tih thu dawn a ni.
Inthlanna tur huam chhunga cheng, hemi chungchanga biakpawhte chuan inthlan a hnai telh telh a, mipuiin an ngaihven telh telh tih te, zalen leh ralmuang taka campaign theih a nih thu te an sawi.