Sinner a chak nawn leh

Turin khawpuiah ATP Finals khelh chhunzawm zel a ni a, tualchhung tlangval Jannik Sinner chuan hnehna chang nawnin semi-final a hnaih tawh hle. Thawhleh zana inkhel dangah Daniil Medvedev chuan hnehna a chang ve ta bawk.
World No. 1 Jannik Sinner hian group match-a a khelh hmasak berah Alex de Minaur chu set hloh lovin a lo hneh tawh. An tualzawlah ngei tha taka bul a tan hnuin a match hnihnaah Medvedev hnehtu Taylor Fritz a hmachhawn zui leh. Inkhel hmuhnawm takah set hloh lovin a chak zui leh a, semi-final lut tluk a ni tawh.
Sinner leh Fritz te hian hmuhnawm takin bul an tan a, an inhnehtawk hle. Game an inlakchhawk zak zak hnuin Sinner-a’n break pawimawh zet mai a nei a, game li hloh chungin set hmasa a la. Set hnihnaah pawh an inhnehtawk zui leh viau a, an inkhel tawk zui leh hle. Chak tur zawk rin thiam har khawpa an inhnehtawk hnuin hun pawimawh takah Fritz-a’n a serve a hum zo lo nawn leh a, Sinner-a’n set a la zawn leh a. Italian World No.. 1 Sinner hian 6-4, 6-4 in Taylor Fritz lakah hnehna a chang.
Kum 2024 chhungin Jannik Sinner hi a khel tha viau a, Grand Slam pahnih; Australian Open leh US Open-ahte a champion. Saudi Arabia a sum tamna Six Kings Slam-ah champion hmasa ber a ni zui leh bawk. Sinner hian a vawi khat nan World No. 1 ni chungin kum a khar dawn a. |ha zawka kum khar turin ATP Finals-ah hian a vawi khat nan champion ngei a tum ang. Italian hian vawi hnih a khelh tawhah set hloh lovin hnehna a la chang ve ve a, Ilie Nastase Group-ah hmahruaitu niin semi-final lut lut a ni der tawh.
Ilie Nastase Group a inkhel dangah vawi khat tlawm tawh Daniil Medvedev chuan a khingpui Alex de Minaur chu set hloh lovin a hneh ve bawk. Medvedev hian game hnih chiah hloh chungin set khatna a la. Awlsam taka set khatna a lak hnuin set hnihnaah an inhnehtawk viau a, Russian hian break a neih a chhawr tangkai a, 6-2, 6-4 in hnehna a chang. Medvedev hian vawi hnih chak zawn tawh Jannik Sinner a hmachhawn zui leh dawn a, fiahna hautak a hmachhawn a ngai dawn. Semi-final luh beisei zui thei turin tun laia khel tha tak Sinner a hneh ngei a ngai dawn. Hetihlai hian Taylor Fritz chuan vawi hnih tlawm zawn tawh Alex De Minaur a hmachhawn zui leh dawn a, semi-final luh theihna hun tha a la nei.
World No. 1 Sinner a chak zawn lai hian tlawm chunga bul tan Carlos Alcaraz chuan practice a hmachhawn tluan thei lo va, he thu buatsaih lai thleng hian inelna a hmachhawn zui thei dawn em tih a la chiang thei rih lo.