Sinner dam loh vanga chak nuamsa Alcaraz

Defending champion Jannik Sinner chu Thawhtanni zan Cincinnati Open final-ah minute 23 an khel tling chauh tihin damlohnain a tlakbuak a, set khatnaa 5-0-a a hnufual mek laiin a inhnukdawk lo thei ta lo a, hahdam zawkin Carlos Alcaraz a champion theih phah.
US Open title a kawl lai humhim tura New York Grand Slam tournament an tan hma ni ruk chauh awm tawhah world number one Sinner hian Cincinnati khawlum a zo lo a ni ber a, a trainer-te’n a chalah vur tui vawtte’n han dehsak bawk mah se khelh chhunzawm theiah a inngai ta lo a, umpire leh official-te hnenah a inhnuhdawh thu hrilhin, fans lakah thupha a chawi a, inhrukpuana a hmai hupin a mittui a dang zo lo.
Italian hi a elpui Spanish world number two Alcaraz pawhin a pan hnai vat a, kuah chunga hnem mawlh mawlhin, amah tintu camera lens-ah “Sorry Jannik” tih a ziak bawk.
Sinner pawhin mipui hmaah thupha chawiin, “Ka tih lunghnur che u avangin pawi ka ti a; nimin atang khan ka nuam lo tawh a, ka ziaawm mai ringin khelmual ka lut a, ka nuam lo zual ta tlat a, match rei lo zawk pawh ni dawn se han tih luih hram hram ka tum nain ka tlin ta ngang lo a ni.
“In zavaia chungah thupha ka chawi a, Thawhtannite a ni a, hna thawh tur neite pawh in ni ang a, tha thulha he laia in lo kal thlawn hi pawi ka ti takzet a ni,” a ti.
Tun kha Spaniard Alcaraz-a tan Cincinnati title a hawn vawi khatna niin, season kal laiah chuan a trophy pasarih lakna a ni tawh thung.
A tumpui inhnuhdawh hnuah Alcaraz chuan a champion dan chu a duhdan a nih loh thu sawi chungin, “I khawng thin dan aia khawng zawk khan i lo kir leh ngei dawn a, chu chu champion dik takte tihdan a ni ngai, champion i nih kha,” tiin duhsakna a hlan nghal.
Kumin atangin US Open-ah kalphung thar an hmang a, mixed doubles lamah singles player tha ber berte an inlan tam zawk theihna atan tournament tna tak tak hmain mipa leh hmeichhe inkawp inelna chu lo khelh hmasaktir niin, nimin atanga kelh tan tak US Open mixed doubles-ah Sinner, Alcaraz leh women’s finalist Iga Swiatek-te chu bul tan tur zingah telin, Sinner hi Katerina Siniakova nena inkawp tur an nih laiin Pathianni atanga Flushing Meadows-a khelh tan tur singles main draw thlirin a chawlhahdam ta zawk rih a ni.
Sinner kha hard court bika match 26 a chak zawn hnuah ti khan damlohna avangin a chak tluang lai a chhunzawm thei ta lo a, Cincinnati-ah a title kawl lai humhim zo ta lo mah se world number one a nih chhunzawm zel a, US Open title a kawl lai chuhpui theitu hnaivai ber Alcaraz bawk chu top ranking chuhpui thei hlauhawm ber a ni mek bawk.
New York major tournament-ah hian final hma chu rinkai pahnih Sinner leh Alcaraz hi a intum thei dawn lo a, nikuma second round paltlang zo lo Spaniard hian kumin chu rin a rawn kai lehzual dawn a, Cincinnati ang bawkin Italian star kuta title chhuhsaktu a ni leh lo ang tih sawilawk theih a ni lo!
Thawhtanni khan kumin bik final match-a tum li an intawnna ni tawhin, clay-ah vawi hnih Alcaraz a chak a, Wimbledon-ah Sinner dingchang ve thungin, Lindner Family Tennis Center, Ohio, USA-a final match chu khati kha a ni ta a; Grand Slam trophy hnuhnung pasarih insemzotu pahnihte hi tennis big four hnu lama boruak neilian an ni mek.
Thahwtanni result kan hmuh hnuin head-to-head record-ah 9-5-in Alcaraz a chungnung zawk a, hardcourt bikah pawh 6-2-in a dinhmun a tha zawk .
Spanish second seed Alcaraz hian kumin tennis inelna level sang Masters 1000 title pathum a la tling ta a, Cinicinnati hmain Monte Carlo leh Rome-ah a lo hlawhtling tawh bawk a ni.