Sinner hmachhawn tur Alcaraz

China Open khelh mekah nilaini khan mipa semi-final khelh zawh a ni a, final ah player langsar Jannik Sinner leh Carlos Alcaraz te an inhmachhawn dawn.
Semi-final hmasa zawkah World No. 1 Jannik Sinner chuan a khingpui Bu Yunchaokete chu set hloh lovin a hneh. Champion tura rinkai ber Sinner hian tualchhung tlangval, wildcard hmanga inelna hmachhawn thei hram Bu Yunchaokete a hmachhawn a, beisei anga awlsamin hnehna a chang thei bik lo. US Open champion Sinner hian beisei lawk ang ngeiin bul a tan tha a, game thum chauh hloh chungin set khatna a la.
Awlsawm pangngai takin set khatna la bawk mah se set hnihnaah erawh fiahna hautak zawk a hmachhawn. Set hnihnaah tualchhung tlangval Yunchaokete a khel tha ta viau a, game an inlak chhawk ta zak zak. Game an inlakchhawk zak zak hnuin tie-break khelh a ni a, tie-break-ah Sinner a chungnung a, Yunchaokete lakah hian 6-3 7-6 (7-3) a hnehna changin final a lut ta a ni. Italian hian final ah fiahna hautak a hmachhawn dawn a, World No. 3 Carlos Alcaraz a hmachhawn dawn.
Sinner laka fiahna hautak hmachhawn zui tur Alcaraz hian semi-final-ah Daniil Medvedev a hmachhawn a, awlsam taka hnehna changin final a lut.
Alcaraz hian khingpui hautk Medvedev lakah bul tan tha vut lo mah se break pawimawh tak a nei a, game nga hloh chungin set khatna a la. Set khatna a lak hnuin set hnihnaa a khel tha leh zual a, a khingpui hian a khan lo sawt hle. Set hnihnaah break a neih zawn hnuin Alcaraz hian minute 88 chhung lekin 7-5, 6-3 in hnehna a chang hman a, final a lut. US Open second-ah Botic van de Zandschulp laka a mualpho hnuin Alcaraz hian vawi riat hnehna a chang zawn leh ta chiah a ni.
Sinner vs Alcaraz
Tunlaia player tha pahnih; 2024 chhunga Grand Slam pali insem a, Grand Slam pahnih ve ve latu Jannik Sinner leh Carlos Alcaraz te hi vawi kua an lo inhmachhawn tawh a, an inkarah vawi nga hnehna chang Alcaraz a pawng hret zawk. An intum hnuhnung pahnih; French Open leh Indian Wells-ah Alcaraz a chak zawn a. Final-a an inhmachhawnna tur Beijing-ah hian 2023 khan Sinner hian set hloh lovin hnehna a chang ve thung.
Final-ah Sinner a chak a nih chuan vawi 10 an intumah chungnung zawk awm lovin 5-5 a ni chiah dawn a, Alcaraz a chak a nih erawh chuan a elpui lian lakah 6-4 in hma a hruai ve thung ang.