Sinner hmachhawn tur Medvedev

US Open 2024 khelh chhunzawm zel niin, a hmawrbawk a hnai tan tawh. Thawhlehni khan mipa last 16 khelh a ni a, Jannik Sinner leh Daniil Medvedev te quarter-final-a intum turin an chak. Champion lai Novak Djokovic a tla tawh a, Carlos Alcaraz a tla tawh bawk. Quarter-final-ah Sinner leh Medvedev te intum tur hi final ai pawha hmuhnawm a nih a rinawm.
World No. 1 Jannik Sinner hian last 16-ah inelna thlengtu lam inngahna lian Tommy Paul a hmachhawn a, inkhel hmuhnawm takah sete hloh lovin hnehna a chang. A khingpui lakah set hloh lo mah se Sinner hi awlsam taka chak erawh a ni lo hle thung a, tie-break vawi hnih ngawt khel chunga chak a ni.
Champion tura rinkai Sinner leh tantu nei ngah tak Paul te hi an inhnehtawk hle a, inkhel hmuhnawm tak an lantir. Set khatnaah game an inlakchhawk zak zak a, tie-break khelh a ngai nghal pang. Tie-break ah World No. 1 Sinner a chungnung a, set khatna a la. Harsa taka set a lak hnuin set hnihna a harsa zui leh viau. Set hnihnaah pawh game an inlakchhawk leh zak zak a, tie-break hmang bawka thelh an ngai zui leh. Tie-break-ah Sinner a chungnung zui leh a, set a la nawn leh. Inkhel rei takah set hnih a hloh zawn hnuin Tommy Paul a hnual a, a tha a kiam ta viau bawk. Player tlo tak Sinner hian awlsam takin set thumna a la zui leh a, tualchhung tlangval Paul lakah hian 7-6 (7-3) 7-6 (7-5) 6-1 a hnehna changin quarter-final a lut.
Thawhtan zan rei lama inkhelah US Open 2021 champion Daniil Medvedev chuan a khingpui Portugal player Nuno Borges chu 6-0 6-1 6-3 ngawtin a sawp a, awlsam takin quarter-final a inhlangkai. Medvedev hian quarter-final-ah fiahna hautak a hmachhawn zui dawn a, champion tura rinkai ber Jannik a hmachhawn a ngai dawn.
Quarter-final a inhmachhawn tur Jannik Sinner leh Daniil Medvedev te hi an intum tawhah an inhnehtawk thei viau. vawi 12 an inhmachhawn tawhah Medvedev a chak hnem zawk a, vawi 7 a chak tawh. Sinner hian Russian Medvedev hi vawi 5 a hneh ve tawh bawk. An intum hmasa paruk ngawtah Medvedev a chak vek. Hemi hnu hian vawi nga Sinner a chak zawn ve leh phawt. An intum hnuhnung ber chu Wimbledon 2024 quarter-final-ah a ni a, he mi tum hian Medvedev hian set hnih hloh chungin hnehna a chang. US Open quarter-final ah pawh an inhnehtawk leh viau tura ngaih a ni a. An inkhela chak zawk zawk hian champion turin rin an kai zui viau dawn a ni.
last 16-a inkhel dangah Jack Draper chuan a khingpui Tomas Machac chu set hloh lovin a hneh a, Grand Slam-ah a vawi khat nan quarter-final a lut. Drapper hian quarter-final-ah Jordan Thompson hnehtu 10th seed Alex de Minaur a hmachhawn zui leh ang.