Sinner kutah Vienna title

Sinner kutah Vienna title
Season kal laia a title palina chu Pathianni khan Vienna khawpuiah Jannik Sinner chuan hlawhchhuakin, Vienna Open final-a a khingpui Alexander Zverev lakah set khatna hloh zet chungin 3-6 6-3 7-5 hnehna a chang.
Top seed Sinner hi indoor hard court bikah match 21 zet a chak zawn tling ta a ni.
Pathianni final-ah kaihza tha na avangin bul tan fuh lo mah se darkar hnih leh a chanve chhungin German player dam tha veng vawng lakah a chak a, thla khat chhunga a title pahnih lakna niin, a hmasa zawk chu tun thla tir lam China Open-a a champion kha a ni a; kumin hian grand slam men’s singles tennis title pahnih Australian Open leh Wimbledon trophy a la bawk.
Defending champion a nihna 2025 Australian Open final-ah pawh khan Italian Sinner hian Zverev bawk lo hneh tawhin, 2025 Wimbledon Championships final-ah two-time defending champion Carlos Alcaraz chu 4-6, 6-4, 6-4, 6-4-in a hneh bawk.
Vienna Open title hlawhchhuak chunga a career-a tour-level title 22 a khawl tling ta mai mak a tih thu Sinner hian sawiin, , Vienna Open final-a a bultan dan harsa a tih thu leh rilru lama khauh tlat turin a insangphek nasa tih a sawi.
Pathianni final kha kumin January thla Melbourne final hnu lama Sinner leh Zverev intum leh vawi khatna chiah niin, 2021 Vienna Open champion Zverev hian Vienna-ah khan phuba lak a tum ruh hle a, set khatna pawh minute 46 chhungin a la mai a, mahse, Sinner a inseamtha a, set hnuhnung pahnih la zawnin world number three Zverev a vel nawn leh!
Pathianni vek khan mipa doubles final-ah Great Britain pair Julian Cash leh Lloyd Glasspool thawkdun chuan an pahnih tangduna season kal laia Tour-level title pasarih an lak tlinna ni turin Austria player Lucas Miedler leh Portugal mi Francisco Cabral tangdun lakah 6-1 7-6 (8-6) hnehna an chang.