Sinner leh Frtitz ten semi-final an lut
Ningani zan khan Tusin ah ATP Finals khelh chhunzawm a ni a, Ilie Nastase group ami ten group match an khel zo. Ningani zanah hnehna an chan ve ve vangin Jannik Sinner leh Taylor Fritz ten semi-final an lut.
An rama inelnaah Jannik Sinner a chetha viau a, vawi hnih a chak zawn tawh. Vawi hnih a chak zawn vangin semi-final a hnaih viau a, semi-final lut turin set khat lak chiah a mamawh. A khingpui lakah tlawm pawh ni se inkhel dangah Alex de Minaur a chak loh a nih chuan Sinner hian semi-final a lut tho dawn bawk. Dinhmun tha taka ding tawh chungin Sinner hian vawi khat chak tawh Daniil Medvedev a hmachhawn a, set hloh lovin hnehna a chang zui leh.
World No. 1 Sinner hian Russian star Daniil Medvedev lakah bul a tan tha leh viau a, set khatnah tir lamah break a nei nghal. Set khatnaah hian game thum chauh a hloh a, awlsam pangngai takin set a la. Set khatna a hloh hnuin semi-final luh beisei zui tura chak mamawh Medvedev a khel tha hret. Set hnihnaah an inbeitawk hle a, game an inlakchhawk zak zak. Chak zawk tur rin thiam har khawpa an innawr tawk hnuin Italian Sinner-a’n break pawimawh tak a nei leh ta mai a, game li hloh chunga set la zui lehin Medvedev lakah hian 6-3, 6-4 a hnehna changin group match-ah a chak vek a. Ilie Nastase group-ah champion ni chungin semi-final a lut.
Ilie Nastase group a inkhel dangah vawi khat chak tawh Taylor Fritz chuan chak la nei lo Alex de Minaur a hmachhawn a, set a hloh hmasak zet hnuin hnehna a chang. Semi-final lut thei tura straight set a chak mamawh Minaur hian bul a tan tha viau a, harsa takin set khatna a la. Set khatnaah hian an inhnehtawk viau a, game nga ve ve an lak hnuin Minaur-a’n break a nei. Break a neih hnuin a serve a hum zui a, set a la ta a ni.
Set hloh hmasa zawkah a tang hnuin Taylor Fritz a insiam tha thuai a, a rei tulh tulh a,m a khel tha tulh tulh. Set hnihnaah break pawimawh tak a neih hnuin game li hloh chungin set a la. Set khat ve ve an lak hnuin deciding set khelh chhunzawm a ni a, deciding set tir lamah Fritz an break a nei zui leh a, Australian Alex de Minaur lakah 5-7, 6-4, 6-3 in a chak zui ta a ni. Minaur lakah a chak vangin American Taylor Fritz hi Ilie Nastase group-ah pahnihna a ni a, semi-final a lut.