Sinner veltu thang Alcaraz bawk dingchang leh

A match khelh hnuhnung 26-a chak fai vek world number one Jannik Sinner chu a ngam loh laklawh Spaniard Carlos Alcaraz lakah Pathianni khan tlawm lehin, Italian Open final-ah 7-6 (7-5) 6-1-in tualchhung tlangval hi a chak lo a, ti hian, vawili an inhmachhawnah Sinner hi Alcaraz lakah a tlawm fai vek a ni!
Doping ban avanga thla thum a inkhelh theih loh hnuah tun kha Sinner-a’n tournament a hmachhawn leh vawikhatna niin, kum 1976 champion Adriano Panatta hnu lama Italian zinga he tournament men’s singles title la leh thei hmasaber nih a tumna a puitlin zo ta lo a ni.
Inrinni khan Jasmine Paolini chu kum 40 chhunga Italian hmeichhiate zinga Italian Open hmeichhe singles title la thei hmasaber a ni a; mipa lamah kum 49 chhunga he ram claycourt tournament liana singles title hawn leh thei hmasaber nih tumin Sinner chuan khelmual a lut a, a ngam loh than Spaniard bawkin a dangchat leh ta a ni.
Kum 22 mi lek ni chunga Grand Slam title pali la tling tawh Alcaraz hi reigning French Open champion niin, kartawp Pathianni atanga khelh tan leh tur Paris claycourt tournament lian atan pawh rinkai a nihzia Rome khawpuiah a rawn nemnghet leh ta a ni.
Chu mi chungchang chu sawichhuakin, “Jannik hneha Rome title lak hi ka tan inrintawkna thuk tak nena Paris pan theih phahna tur a ni,” a tiin.
Sawizawmin Alcaraz chuan Rome khawpuia a title hmasaber chuan a tihlim hle tih sawi chungin a tawpna a nih loh a beisei thu a tarlang tel.
Nikum October thla China Open final-a Alcaraz a hneh loh hnu khan Sinner hi damdawi hman phal loh enfiahna paltlang loh chungchanga a hrem a nih hma zawng khan a chak chho ngat ngat a, thla thum a chawlh hnua inelna a hmachhawn leh vawikhatnaah a chak tluang lai chu Spaniard bawkin a tihtawpsak leh ta a ni!
Hremna avanga a chetchhuah theih loh boruak sawiin Sinner chuan, “Thla engemawti chhunga ka hun tawn kha a awlsam lo a, chuti chunga he hmuna final ka khel thei hi result ropui a ni hrim hrim.
“Vawiin hian ka theihtawp ka chhuah a, mahse, kha kha ka tih theih zawng chu a ni. Fiahna tha tak a ni e.”
Tun kha Masters 1000 final bika player pahnih insut vawikhatna niin, kumin January thla Australian Open-a a champion hnua Sinner-a tournament khelh leh vawikhatna a ni a, tlemin a la khawr deuh a nih pawhin a awm tho mai thei!