Sipai chaknaa Ukraine ram lak belhah Putin-a’n vau

President Vladimir Putin-a chuan US-in indona titawp tura rawtna chu Kyiv leh European politician-ten an pawm mai a nih loh chuan Russia-in tharumin Ukraine ram a lak belh zel dawn tih a sawi.
US hian Russia leh a hranin Kyiv leh European hruaitute chu Ukraine-a indna tihtawp tumin a be ve ve tawh a; mahse, eng inremna mah an la sawi chhuak lo va. Kyiv leh a thawhpui European-te hian Ukrainian ram chân an duh lo va, Ukraine hnenah himna tha tawk pek an phut bawk.
Nilainia kum tina neih thin defence ministry thutkhawmah Putin-a chuan kum 2022-a Ukraine-a sipai sang tel tir luttu Russia chuan kil tinah hma an sawn a, an tum chu tharumin emaw, inbiakna hmangin emaw an hlen dawn tih a sawi.
“Lehlam leh an tanpui ram dangte hian sawihona tha tak hi an hnawl a nih chuan Russia chuan sipai chakna hmangin hmun pawimawh hi kan chhuah zalen mai dawn a ni,” a ti.
Russia chuan kum 2014 atanga a luah, Crimea peninsula telin Ukraine ram 19% chuang a luah tawh niin a insawi a, khawchhak lama Donbas region, Kherson leh Zaporizhzhia region tam zawk leh region dang hmun tlem azawng an luah mek.
Russia hian Crimea, Donbas, Kherson leh Zaporizhzhia chu an ramah an chhal tawh a. Ukraine chuan an pawm thei dawn lo va, ram dangte pawhin Ukraine ram chinah an la chhal bawk.
Defence Minister Andrei Belousov-a pawhin kum 2026-a an tum chu na zawka Russia-in beih a ni tih a sawi a. Thu a sawi laia an tar lanah chuan kum 2025-a Russia-in an sum thawh chhuah zawng zawng zinga 5.1% chu indonaah an hmang.
European hruaitute hian Kyiv lam an tan tlat thu leh indona avanga Russia-in hlawkna an neih chu an duh lo.
Putin-a hian US president kal chhuak ta, Joe Biden-a sorkar khan Russia chu tihchhiat vek dan a dap a, European politician-te pawhin hei tho hi an tum a ni tih a sawi a. European hruaitute erawh chuan chutiang an tum loh thu an sawi thung.
European hruaitu thenkhat chuan Russia hi inremna a awm theih nana inbiaknaah rilru pe tak tak lovah an puh ve mek bawk.