Sipaiten Suu Kyi-i hriselna a tha tih puang

A fapain a chanchin a hre tlem a, a hriat lohvin a lo thih mai pawh a hlauhthawn thu a sawi tukah Myanmar-a sipai sorkar chuan an ram hruaitu hlui an hren mek, kum 80 mi, Aung San Suu Kyi-i chu ‘a hrisel tha’ tih an sawi.
Kar tira Tokyo-a an kawmnaah Kim Aris-a hian a nu chanchin chu kum eng emaw zat a hriat tawh loh thu leh Myanmar khawpui, Naypyidaw-ah mi be thei lova an dah a nih a rin thu a sawi a ni.
Nobel Peace Prize dawng tawh, Suu Kyi-i hi kum 2021-a sipaiten mipui thlan sorkar paih thlaa thuneihna an chan khan an hreng nghal a. A ni lo zawnga mi fuih phur, ei ru leh inthlan tichingpena puhna thubuaiah kum 27 chhung lung in tang tura tih a ni a, amah chuan an puhna hi a pha vek.
“Daw Aung San Suu Kyi-i hi a hrisel tha,” tiin sipaite enkawl Myanmar Digital News chuan Thawhlehni khan an puang a. A dinhmun chiang tak erawh engmah an sawi tel lo.
“Sipai sorkar hian a hrisel tha tih an sawi a, mi dang hnen atanga finfiahna, a thlalak tharlam, damdawi thiamte enna lehkhaa fiahna a awm lo va. A chhungte, doctor leh ram dang atang pawhin hmuh theih a ni lo va. A dam tha tak tak a nih chuan a finfiahna pawh an nei thei ang,” tiin sipai sorkar thuchhuah hi Aris-a chuan chhangin Nilaini khan Reuters a hrilh.
Kar tirah an kawmnaah Aris-a hian December 28 atanga thawh eng emaw zata Myanmar inthlan chu sipaiten Suu Kyi an chhuah emaw, pawn chhuak thei lova an dahna atana an chhuahna remchang a nih theih thu a sawi.
Myanmar-a sipaite hian chawlh pawimawh leh ni bikah mi tang an lo chhuah tawh thin a. Suu Kyi-i ngei pawh hi kum 2010 khan inthlan zawhah chhuah niin hun rei tak an manna ata a zalen.
Aris-a chuan sipai sorkar chu a sawisel a, ram dang sorkarte pawh an ram a zalen theih nana che na tawk lovah a puh a. Inthlan lo awm tur pawh sipaite rorelna sawh nghehna mai tur niin a sawi.
Hetih lai hian kum 2020 hnua an inthlan lehna hmasa bertu tihbuai tumah Aris-a hi sipaite chuan an puh leh ve bawk a. Inthlan hnuhnung ber hi sipaiten Suu Kyi-i’n a tichingpen tia an sawi kha a ni.
Suu Kyi-i kaihhruai, Myanmar-a political party lian ber, National League for Democracy chu thiah a la ni reng a, sipai sorkar duh lo politic pawl dangte chuan inthlan hi an boycott hlawm bawk.
“Burma politic-a inrawlh tumna hi ka nei lo va; mahse, kum tam tak a hranga daha biakpawh theih loh, reh vang vang ringawtah hi chuan tu fapa pawhin a chhe ber thlen an hlau ve tho vang,” tiin Aris-a chuan sipaite puhna leh a nu chungchang a sawi.
“Ka ngaihtuah chhan ber chu ka nu heti chena rei a bo ta hi a ni a, zawhna hrehawm tak, ‘A la dam em?’ tih zawh a ngai hial a ni,” a ti.