Sipai chhuahsan Lammual ram humhalh a ni dawn: Revenue Minister

Sipai chhuahsan Lammual ram humhalh a ni dawn: Revenue Minister
Lammual rama sipai an chhuak dawn hnai nia ngaih a ni a, revenue minister Lalruatkima chuan Lammual ram hi mipui tan humhalh a ni dawn tih leh, mi dangin ram an nei thei lo tih te a sawi.
“Lammual ram hi mipuite ta tur a ni a, chumi atan chuan sorkarin hma a la a. Mi dangin ram an nei thei lo tih hi kan hriat ka duh a, humhalh tlat a ni dawn,” tiin The Aizawl Post a hrilh.
Lammual ramah hian mi 54-in LSC an nei a, Assam Rifles commandant bangalow ramah mi paliin, McDonald Hill-a Assam Rifles ramah mi pathumin an nei bawk. An zinga mi pariatin LSC hi an pe kir tawh a, sipai luah ram hmun thumah mi 53-in LSC an nei mek.
Revenue minister Ruatkima chuan sipai luah ram hi sorkarin a humhalh thu a sawi a, mi dangin ram an neih theih lohna turin dan siam a nih thu a sawi.
“Dan a awm a, hei hi kan sawi fo a. Assembly Session-ah ngei pawh vawi tam kan sawi a, hmun dangah kan sawi thin bawk a. Mahse awih duh tlat lo an awm a, mipui rilru hruai kawi tum kan awm em ni a tih theih rum rum a,” a ti.
A sawi danin, The Mizoram (Restriction on Use of Transfer Land) Act, 2002 a awm a, he dan hmang hian sipai luah ram hi humhalh tlat a ni. He dan hi February thlaa neih Budget Session-ah pawh siamthat (amend) a ni a, sipai luah rama LSC neite hian an pe kir (surrender) lo a nih chuan hrem theih an ni dawn a ni. He dan-ah hian LSC pe kir lote hi lung in tantir thlenga hrem theih an ni ang tih a ni a, mahse India ram kum 75 tlin lawmnaah lung ina intantir hi suahsualna lam ni lo thil dangah a theih chen chena tih loh ni se tih a nih avangin Budget Session liam taah khan chu chu tidanglamin pawisa chawitira hrem an ni ang tia siamthat a ni.
“MNF sorkar hmasa khan The Mizoram (Restriction on Use of Transfer Land) Act, 2002 hi a siam a, khang lai khan sipai luah ramah mi dangin ram an neih hi khap a ni daih tawh,” a ti a, tunah pawh LSC neite hi insawifiah tura tih an nih thu leh, hemi atan hian Zirtawpni khan show case notice pek an ni tih a sawi.
“Sipai luah rama LSC neite chungchangah hian YMA lamin court-ah PIL an thehlut a, court kutah a awm avangin sorkarin hma a la thei lo zawk a, remchang hmasaah show case notice hi tih a ni,” a ti a, “MNF an sorkar chhung chuan sipai luah ram hi humhalh a ni ang,” a ti bawk.