Sipai hnaruak data pechhuak duh lo
Defence ministry chuan ‘national security’ chhuanlamin armed forces personnel indaihlohna chu kimchangin a sawi duh lo va, tun hma chuan Parliament a zawhna a awmin ziakin chhan a ni mai thin thung.
“Information dil hi sensitive operational thil national security kaihhnawih a nih avangin vantlang hriata hmuh theih tura national security kaihhnawih lailan chu a rem lovang” tiin Minister of State for Defence Sanjay Seth chuan Rajya Sabha-ah ziakin chhanletna a siam a ni.
A hmain Member of Parliament Anil Kumar Yadav Mandadi chuan sorkar hian armed forces-ah staff-te officer, sipai leh medical officer etc te indaihlohna a nei em? A nei a nih chuan a kimchangin min hrilh turin leh chung hmun ruakte hnawhkhah a nih theih nan hmalaknate min hrilh turin ka ngen a ni tiin zawhna a lo siam tawh a ni.
Tun hma zawng chuan hetiang zawhna Parliament-a zawh a nihin ziakin chhan mai thin a ni a. March 13, 2023 pawh khan MP Javed Ali Khan chuan Rajysa Sabhaah zawhna a neih chu Minister of State, Defence Ministry Ajay Bhatt chuan ziaka chhangin March 10, 2023 thleng khan officer 8,070 leh Junior Commissioned Officers (JCO) leh Other Ranks (OR) hna ruak 1,27,673 a awm thuin a chhang a. January 1, 2023 atanga March 10, 2023 thleng khan officer hnaruak 613 leh JCO/OR hnaruak 19,065 hnawhkhah a ni tawh tiin a chhang bawk.
Agnipath scheme
June 14, 2022 khan sorkar chuan armed forces sipai lak nan Agnipath scheme hmang tanin sipaite chu kum li chhung atan zel lak an ni a. Kum 2026 thlengin Agniveer 1.75 lakh lak hman tum niin kum li an service zawh hnuah regular cadre atan 25% lak an ni leh dawn a ti bawk a.
August 8, 2022 khan MP Dr. Fauzia Khan zawhna chhangin Bhatt chuan Rajya Sahba-ah kum tinin armed forces pathum-ah superannuation, premature retirement, medical reason, casualties etc. avangin hmun ruak 60,000 ang vel zel awm ang a ni a lo ti tawh bawk a. “Tun dinhmunah officer hnaruak 7,799, Army-ah siapi hna ruak 1,08,685, officer 1,446 leh Navy ah sailor 12,151, officer 572 leh Indian Air Force-ah airmen 5,217 hna a ruak mek” a lo titawh bawk.
Kum 2020 leh 2021 khan Covid-19 avangin sipai hnalak a khaihlak nasa tiin Bhatt chuan sawi bawkin, “mahse Covid-19 a zia deuh hnuah kum 2022 atangin sipai lak tan leh a ni,” tiin a sawi bawk.
Kharge-an sawisel
Congress president Mallikarjun Kharge chuan social media platform X-ah Prime Minister Narendra Modi tag chungin ‘fake nationalist BJP te kan thalai ram hmangaih te laka Agnipath scheme barhluia an hma lam tichhetute hian information pawimawh pawh public domain-ah an phochhuak duh tawh lo’ a ti a.
“Modiji i sorkar ngeiin heng information pawimawh officer, sipai, JCO leh medical officer hnaruak te inpholang reng thin a. Tunah eng vanga pholang duh lo thut nge in nih kan hrethiam lo” tia sawiin Kharge chuan, “Sipai hnaruak information chuan ngaihtuah lawkna thalo taka kalpui Agniveer induction ah zawhna a siambelh inhlau em ni? Rajya Sabha ah tun hma zawng pawhin Defence Ministry-in information pawimahw an pe reng thin a, eng vanga titawp thut nge in nih?” a ti bawk.