Sipai officer thlen theihnaah Congress ruahmanna a lang – Congress Thalai

Sipai officer thlen theihnaah Congress ruahmanna a lang
– Congress Thalai
Tunhnaiah Captain Lalrinawma Sailo s/o Saihmingliana Sailo, Chanmari Aizawl in peace time-a sipai chawimawina sang ber dawttu Kirti Chakra a dawng chu Congress Thalai chuan a lawmpui takzet a. A taimakna leh thawhrimna avanga sipai chawimawina dawngtu hi MPCC president Lal Thanzara pawhin lawmpuina a lo ti chhuak tawh tih a sawi a. He dinhmun thleng thei tura a kalkawng zawh hautak zetah hian Congress sawrkar kalta in thalaite tana ruahmanna a neih that zia leh hlawhtlinna a lan chhuahnaah a ngai tih a sawi.
Congress Thalai Hqrs. thuchhuah danin, Rashtriya Indian Military College (RIMC) Dehradun chu British hunlai atang tawha zirna in sang leh tha chungchuang a ni a. He hmuna zir theih hi thil harsa tak, a tling tan pawha senso hautak tak a nih avangin kum 2015 khan khatih laia Education minister Pu Rohluna leh parliamentary secretary Pu Joseph Lalhimpuia te ruahmannain a fee atanga 75% tum sak an ni a. Pu Lalrinawma Sailo pawh hi kum 2018 khan NDA-a inziaktling zinga a tel bakah Congress kaihhruai Mizoram sawrkar chuan Incentive Cash Award hmu zingah telhin cheng nuai 10 a hlan tih a sawi a ni.
Pu Lal Thanhawla kaihhruai Congress sawrkarin thalaite hmakhua ngai a, thalaite khawvel thar buatsaiha a lo siam nasat zia a takin Mizoramin a hmu zel tih sawiin, ‘Tun hnuah Incentive Cash Award thawm a awm zui loa, sipai ni tura inzir lawkna hmun tha RMIC-ah pawh Mizo zirlai an awm mang ta lo hi pawi kan ti a. Ram hmangaihna hi thu chauh ni lo, thiltih hmanga hlen chhuak turin ZPM sawrkar kan ngen a. Kalphung thar an zawrh ang an lantir theih loh avanga, an ni pawhin an ti ve tho, tia thiam inchanchawp vel mai mai loa, thalaite khawvel buatsaih turin kan hriattir a ni,’ Congress Thalai chuan a ti.