Sipai paruk inhliam

Jammu & Kashmir-a Rajouri district-ah Thawhlehni khan ramri hnaih khuaa chilpuah bomb puak avangin sipai paruk velin hliam an tuar.
He thil hi Nowshera sector-a Khamba Fort bul maiah chawhma dar 10.45-a thleng niin sipai patrol duty-te zinga pakhatin rahpuah bomb phum a rah vang niin PTI chuan a tar lang.
Hliam tuar sipaite hi a bul hnai damdawi inah rang taka tlanpui nghal an ni a, na lutuk an awm lo va, ngaihtuahawm an awm lem lo nia sawi a ni.
Rahpuah bomb hi Line of Control bul maia puak a ni a, hetiang hi sipaite hian ramri kâna a ruka thenawm ram atanga India-a lut turte lo dal nan an hmang fo thin.
Ram himna atana tih ni mah se ruah leh vur nasa taka a tlak hian an phumna hmunte hi a lo insawn phah thin a, sipaite vek hian vanduaina tawh phah nan an lo hmang tawh thin a, tun tuma mi hi hetiang hi a ni em tih erawh finfiahna a la awm rih lo.