Sipai sawn chhuah nana Congress hmalakna sawi

Sipai sawn chhuah nana Congress hmalakna sawi
Congress party general secretary Lalbiakzama’n Nilaini khan Press Club-ah thuthar lakhawmtute a kawm a, chief minister-in Budget Session-ah Assam Rifles sawn chhuah chungchangah Congress sorkarin tha an thawh ve lem lo tia a sawi chu chhangin, Congress sorkar hmalakna a sawi.
MPS officer hlui, home department-a awm thin Lalbiakzama hian sorkar hna a thawh laia 2015 atanga 2019 thlenga AR sawn chhuah chungchanga thil kal dan a sawi a, AR sawn hi 1987-ah Mizoram sorkar nawrna avangin khatih laia prime minister Rajiv Gandhi-a’n a lo tiam tawh thu leh Zokhawsang ram ruahman fel nghal a nih thu sawiin, home department kutah 2005-ah dah ni tawh mah se a tak taka home department-in a thawh chu 2015 vel atangin a ni tiin a sawi.
A sawi danin, 2013 October 10-ah khatih laia revenue minister JH Rothuama hoin Advisory Committee on Use of Assam Rifle’s Land te pawn meeting an lo nei tawh a, mahse home department an la tel lo a, Renu Sharma principal secretary, home a nih khan Assam Rifles leh Zokhawsanga an hmunhma tur buatsaihtu EPIL ( Engineering Project India Limited ) te nen 08.11. 2016 khan meeting koh a ni ta a, AR te’n an ram luah chin hi Government of India Act 1935-in a sawi angin a neitu an nih thu an rawn sawi chhuak a, home department chuan he dan lo zirchianga AR te tanchhan hi a ni thei em tih lo chian turin law department hnenah ngenna an thlen a, law department hian an zirchian hnuah he an dan rawn tlawhchhanah hian AR te hi ram neitu an nih theihna tur a awm lo tiin an chhang a ni.
Mizoram sorkar tanchhanchu S Barkataki, DeputyCommisioner Lushai Hills thupek Dt.28.6.1952, Assam Rifles te luah chin tur ram sawifiahna leh Standing Order No. II Of 1952, Dt, 8/8/1952 Assam Gazette a chhuak kha a ni tih a sawi a, AR lamin sawi tur leh tanchhan tur an van sawt khawp mai tiin a sawi.
Mizoam sorkarin AR tanhmun a phehsak zel tiin a sawi a, MoU draft an thehluha an luah chhunzawm tura an tih. Quarter Guard leh a chhehvel, Loch House te pawh an hnial tlat tia sawiin, “An kalsan tur an in hluite pawh kan mamawh lo, thiat ula, hawn phei vek ang che u kan ti a ni,” a ti.
Lalnunmawia Chuaungo home department principal secretary a nih hnu-ah an bawhzui chak lehzual a, Khatla ram atang pawha nawr chhuah an tum tih sawiin, Zemabawka loneitute’n AR ho lak a harsatna an tawh loh nan tiin Zokhawsang tlak lama AR ram pawnah zel kalin bypass kawng laihsak tura hmalak a ni a, formation cutting chu an zo hman ti tih tawh tiin a sawi. PWD, P&E leh PHE hotute pawhinAR ho mamawh tur ang chu tihsak vek a ni tawh a, mahse vaiho tih dan dik takin sawi nawi leh sel tur an dap ve ngar ngar bawk tiin a sawi.
“Heng kan hmalak dan zawng zawng hi home department file-ah hmuh theihin a la awm vek a. Kan chief minister leh a thawhpuite mai bakah tuna kan MLA leh Mizoram mipuite tan hian en theih reng a ni e,” Biakzama chuan a ti.
2018 kum tawpah sorkar a piang tih a sawi a, 2018 November, December leh 2019
January thla kha kan han ngawi deuh a tia sawiin,. 07.02.2019-ah MHA-in AR te sawnchhuah chungchang sawiho turin meeting a ko tih sawiin, “He meeting-ah hian Mizoram sorkar aiawhin keimah ka kal nghe nghe a, hemi tum meeting-ah hian Assam Rifles te May 31 hmain an insawn chhuak tur a ni tih thutlukna siam a ni ta a ni,” a ti.
“A tira thupek siamtu leh an insawnna tur zawng zawng lo buatsaiha lo peihtute engmah ti ve lo anga kan CM-in a’n sawi mai hi chu a duhthawh ve deuh em aw?” tiin a sawi.