Sipaite nunchan zirna lian, INIOCHOS-25-ah IAF tel ve

Sipaite nunchan zirna lian, INIOCHOS-25-ah IAF tel ve
Thawhtanni atanga Greece-a tan, ram tam taka thlawhna sipaiten an thiam thil entirna nunchan an zirhona, INIOCHOS-25-ah Indian Air Force (IAF) pawh an tel ve mek a. Nunchan zirnaah hian US, Israel leh France ram dang eng emaw zat an tel.
IAF hminga thawk chhuakte hian Su-30 MKI indo thlawhna bakah IL-78 leh C-17 thlawhnate pawh an inlanpui a. Nunchan zir hi Hellenic Air Force-in Andravida Air Base-ah April 11, 2025 thleng a thleng dawn a ni.
INIOCHOS hi kum hnih dana neih thin niin Hellenic Air Force-in a thleng thin a. Ram hrang hrang sipaiten van boruaka an theihna pho chhuah nan, ram dang thiamna leh theihna zir nan leh sipaia inkungkaihna tihnghehna atana an hman thin a ni.
Hellenic Air Force-in thuchhuah a siamah chuan kuminah hian ram tam tak atangin indo thlawhna leh helicopter an inlan dawn a. Thawh thumin thil an ti dawn tih an sawi.
Thawh hmasa ber hi March 24-30 inkara neih kha niin a tel tur ramten an hmanraw inlanpui turte an thlenpui a. Thawh hnihna chu a pui ber niin Thawhtanni khan tanin April 11 thleng a awh dawn a, van sangah an hmanraw kente chu nunchan an zirpui dawn a ni.
April 11-13 chhungin thawh hnuhnung ber a awm ang a, hetah hian a tel ramte hi an ram theuhva an kir leh hlawm dawn a ni.
Hellenic Air Force-in thuchhuah a siamah chuan tun tum nunchan zira an tum ber chu boruaka inbeihnaa chet lak dan, mahni inven nana beihpui thlak dan, tum bik neia boruaka beihpui thlak dan, khawmuala beihpui thlaka thlawhna atanga puih dan, tuipuia beihpui thlaka boruak atanga puih dan, boruak atanga mi beih leh zawn dan, hun bi tuk chhunga tum tak hlen tum leh hmanraw neih that pho chhuah te chu an zir tum a nih thu an sawi.
Hellenic Air Force leh IAF bakah hian France-in M-2000, Israel-in G-550, Italy-in Tornado, Montenegro-in B-412, Poland-in F-16, Qatar-in F-15, Slovenia-in PC-9 pahnih, Spain-in F-18, UAE-in M-2000/9 leh US-in F-16, KC-46 leh KC-135 an thawh chhuahpui dawn.
IAF-in a tar lan dan chuan Exercise INIOCHOS 25-a an tel hi ram dangte nena an inkungkaihna tihnghehna tura ni a, boruaka thawhhona tha zawk an neih theihna tur a nih thu an sawi.
Thuneitu sang pakhat chuan India sipaite hian he hunah vansanga beihpui thlakak ruahmanna leh tih tur hlen thei turin an inzir ang a, vansanga indonaah tih dan thar zirin khawthlir thar leh din dan thar an hre dawn a ni tih a sawi.
IAF hi nikum October thla khan 12th Joint Military Training (JMT)-ah Republic of Singapore Air Force (RSAF) nen Air Force Station Kalaikunda, West Bengal-ah nunchan an lo zir dun tawh.
RSAF hi he hunah hian an thawk rip hle a, F-16, F-15 squadron bakah G-550 Airborne Early Warning & Control (AEW&C) leh C-130 thlawhna an thawh chhuahpui a. IAF hian Rafale, Mirage 2000 ITI, Su-30 MKI, Tejas, MiG-29 leh Jaguar an telpui bawk.