SIR atan form sem zo thawkhat Online-in mahnia ziahluh theih

Special Intensive Revision of Electoral Rolls 2026 neih mekah Mizoramah chuan vote nei theite inziahluhna tur, enumeration form zaa 97 chuang sem chhuah tawh a ni a, heng zinga zaa 22 chuang chu a buaipuitu booth level officer-ten an la let leh tawh. Form-ah hian online-a inziahluh theih a ni.
Chief electoral officer Mizoram Garima Gupta sawi danin, SIR 2026 kalpui mekah 2026 July 1-a kum 18 tling tur chin, India khua leh tui dik tak, Assembly constituency-a cheng nghet leh Parliament of India-in dan a siam anga voter ni thei zawng chu inziahluh theih a ni a. May 30 atang khan June 28 thleng hian booth level officer (BLO) ten anmahni bial chan theuhah voter inziahluhna tur enumeration form sem/ lakkhawm an buaipui dawn tih a sawi a ni.
Electoral roll hnuhnung ber ang chuan Mizoramah voter 875068 kan awm a, heng zingah hian tun thlengin enumeration form (EF) hi mi 850451 (97.19 %) hnenah semchhuah tawh niin, BLO-ten an laklet leh tawh hi 199923 (22.85%) a ni.
ECI-in inkaihhruaina a siamah chuan BLO pakhat hian mi sang khat aia tlem lo zel buaipui tur a ni a, chuti chungin, hmun thenkhatah BLO tan hna a hautak tham hle tih sawi a ni a. Mahni veng/ khuaa awm remchang lo, SIR-a inziaklut duh tan ECINET app hmangin online-a inziahluh theih reng a ni a, hei hi Google playstore leh App Store atanga download mai theih a ni tih an sawi. He app atang vek hian SIR 2026 tehkhawnga hman, 2005 SIR electoral roll pawh en theih a ni tih an sawi bawk.
“India khua leh tui dik takte electoral roll atanga paih an nih lohna turin fimkhur taka hma lak a ni anga, draft electoral roll tihchhuah hun (2026 July 5) a hming lang ve lo pawhin document tul thehlutin electoral roll-a luh theihna hun remchang an nei ang,” CEO Mizoram hian a ti.