Sleep Token-in No.1 album nei ta

On May 20, 2025 53 0

Sleep Token-in No.1 album nei ta
Sleep Token album palina ‘Even in Arcadia’ chu Billboard 200 (albums) chart No.1-ah a debut a, he chart-ah an album No.1 kai thei hmasa ber a nih bakah an album top 10-a lang thei hmasa ber a ni bawk. Hetihrual hian Kali Uchis ‘Sincerely’ pawh No.2-a a debut.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album a hla a mala hralhna atanga album tlukpui te belhkhawm thin a ni.
English rock band Sleep Token album thar ‘Even in Arcadia’ hi 1,27,000 hralhin No.1-ah a debut a, chung zinga 73,500 chu album tak tak hralhna niin, streaming atangin 53,000 (on-demand official stream maktaduai 68.89) tlingin, album-a hla a mala hralhna atangin 500 a tling thei bawk.
Sleep Token hian 2016 khan an hla hmasa ber an tichhuak a, Billboard chart-a an lanna hmasa ber chu 2019 kha a ni. Billboard 200 chart bikah a vawi khat nan 2023 khan an album ‘Take Me Back to Eden’ chu No.16 niin a lang a, Billboard albums chart-a an lan vawi khatna a ni.
Kali Uchis album thar ‘Sincerely’ chu 62,000 hralhin No.2-ah a debut a, chung zinga 38,000 chu album tak tak hralhna niin, streaming atangin 24,000 (on-demand official stream maktaduai 32.45) niin, album-a hla a mala hralhna erawh chhiar tham a awm lo. ‘Sincerely’ hi Kali Uchis album top 10-a lang thei pathumna niin, 2024 khan an album ‘Orquideas’ chu No.2 kaiin, 2023-ah ‘Red Moon in Venus’ chu No.3 a kai tawh bawk.
Charty top 5 a lang album dang chu chart No.1 hlui vek niin, SZA ‘SOS’ chu 51,000 hralh lehin No.3-ah bawk a la awm a, Morgan Wallen ‘One Thing at a Time’ pawh 48,000 hralh lehin No.4-ah bawk a la awm a, PARTYNEXTDOOR leh Drake album intawm ‘$ome $exy $ongs 4 U’ chu 47,000 hralh lehin No.7 atangin No.5 a kai thar leh ta bawk.
Fuerza Regida ‘111XPANTIA’ chu 43,000 aia tam deuh hralh lehin No.2 atangin No.6-ah a tawlh a, chart No.1 hlui Kendrick Lamar ‘GNX’ chu 43,000 hralh lehin No.5 atangin No.7-ah a tawlh a, chart No.1 hlui bawk Sabrina Carpenter ‘Short n’ Sweet’ chu 40,000 hralh lehin No.6 atangin No.8-ah a tawlh ta bawk.
Chart No.1 hlui The Weeknd ‘Hurry Up Tomorrow’ chu 38,000 hralh lehin No.27 atangin No.9 a kai thar leh a, he album hi a CD thar leh vinyl edition an tlangzarh thar a, hralh a kal thar leh ta a ni. Chart top 10 khartu chu Bad Bunny ‘ Debí Tirar Más Fotos’ niin, 38,000 hralh lehin No.1 atangin No.10-ah a tawlh ta a ni.