Smart City leh mipui

Aizawl Smart City Limited hmalakna hnuaiah Aizawl chu smart city ni ve turin cheibawl mek a ni a. Infrastructure lian tak tak kalpui mek karah, a tenau zual deuhte pawh kalpui niin, chung zingah chuan mipui remchanna lamhawi, khawlaia veivak ten awlsam tak leh man tlawm zawka tui an lei theihna tur ‘Tui ATM’ tia sawi mai thin, ‘Roadside Drinking Water Kiosk’ te, plastic bur ruak her dipna khawl RVM (Reverse Vending Machine) te Aizawl khawpui chhung hmun hrang hrangah dah a ni a.
Heng khawl enkawl zui hna hi Local Council-te kutah dah a ni a. Khawsak phung changkang leh felfai neihna tura hmanrua kan inchhawpchhuahsak kawngah hian, mipui smart leh smart loh te, a enkawl kawnga mawhphurtute lam smart leh smart lohte a lo lang thin a. Tuna vending machine chungchangah pawh hian, local council smart deuh leh smart lo deuh chu a hriat theih viau niin a lang. Chutih laiin, mipui smart leh smart lohvin kawngro nasa takin a su thei bawk.
Veng thenkhatah chuan plastic bur ruak her dip turin naupang lam an phur a, an phurna chhan pawh ‘coupon’ a awm vang a ni; chu chuan naupangte a tiphur a ni. Coupon value hi LC ten dawrkai/sumdawngte nen inberemin an siam tur a ni. Veng thenkhatah chuan khawl a function tha lo tiin a siamthat lam pawh ngaihsak zui lovin ngaihthah a hlawh mai a, a hluttu tur mipui tan pawh han tih chiam theihin a awm lo mai thin. Veng thenkhatah chuan khawl an enkawl tha a, a nihna tur angin a function thei a, mipuiin an chhawr tangkai. |ha taka Tui ATM enkawlna huam chhunga mipuite chuan hmun dangah Tui ATM an hmang thiam ang a, a enkawl tha lo veng mipuite chuan Tui ATM an hmang thiam lo emaw a ni ang a, smart leh smart lo inthliarna a awm nghal a ni.
Tuna a lan danah hi chuan, khawtlang hruaitute atanga mipuiah hian ‘smart awarenes campaign’ hi kan la mamawh hle a tih theih awm e. Veng smart ni tur chuan mipui an smart a ngai a, mipui smart tur chuan khawtlang kaihruaituten an mawhphurhna an hlenchhuah that a ngai. ‘Khawl chhungah naupangin lungtê an lo vawm lut thin a, a chhia alawm mawle’ tia kan thlir liam mai mai a, hma lak zui kan tum lo a nih chuan, kan smart har hle dawn tihna a ni. Smart hi zir theih a ni; i zir zel ang u khai.