Smart meter 6000 vuah tawh

Smart meter 6000 vuah tawh
Power & Electricity department chuan smart meter 6202 an vuah fel tawh a, kumin February hian sing hnih vel tih leh hman tum a ni.
P&E hotute leh Mizoram Consumer’s Union hruaitute chuan Zirtawpni khan smart meter billing chungchang an sawiho a. Smart reading lak a nih tawh dawn avangin bill period /cycle a danglam dan tur inhrilhfiah a ni.
Kumin January atang hian smart meter vuah tawh consumer 6202 tan smart reading (automatic-a smart meter-in reading a chhinchiah) hmanga bill siam tan a ni a, heng consumer ho tan hian billing cycle /period siamrem ngei ngei a ngaih avangin billing period ni 30 aia rei a awm a, consumer 6202 bill hi a tam deuh bik tura ngaih a ni. A hnua bill kal lehzel turah erawh billing period hi thla khat zel a ni tawh ang.
Billing period siamrem hi smart meter vuah thar apiangah a tahtawlin kalpui tur a ni a, February hian consumer 20000 vel smart reading lak tum a ni. Hetiang zel hian smart meter vuah tharte chu smart reading lak chhunzawm zel tum a ni tawh dawn a ni.
Consumer-ten vawilehkhata bill an pe kim thei lo a nih chuan electric bill counter-ah installment-in pek theih a ni dawn tih P&E department hotute chuan an sawi.