Solomon Islands lawmaker te chuan pro-China candidate chu prime minister atana thlangin Pacific ram chu Beijing nena inthian tha takin an awm zui zel a ni.
Jeremiah Manele chuan Ningani khan a tumpui Mathew Wale chu hnehin prime minister tura vote tlin a ni a. Tihian Khawthlang ram sawisel fotu PM Manasseh Sogavare chu a thlak dawn a ni.
Manele hi kum 2019 khan foreign minister ni tawh niin khatih lai khan Solomons chuan Taiwan a thlawpna hnawlin China a thlang ta zawk a ni.
China nena inlaichinna a siamthat chhunzawm zel tur thu sawiin a ruka defence leh security pact an kalpui zel ang a ti bawk a. A tumpui ber Wale thung chuan secret deal chu tihtawpa mipui hriata pholan vek a ni ang a ti thung.
Analysts te chuan China a thlawp chungin Manele chuan Solomon traditional Western partner Australia te chu a thawhpui tha zawk ang an ti a, diplomatic communicator tha a ni an ti bawk.
Australian Prime Minister Anthony Albanese chu lawmpuitu hmasa ber pawlah tangin thawhdunna tha an neih a beisei thu a sawi nghal a.
Solomon voters te chuan April thla khan MP an thlang tawh a, mahse prime minister leh leadership chu elected representatives te chuan an thlanchhuah leh thin a ni.
Sogavare chuan kar kalta khan an party-in 17 April general election-a an beisei aia an chet chhiat avangin prime minister atana candidate a tum tawh loh thu a lo sawi sa tawh a, coalition dinin Manele chu prime ministerial candidate atana a thlawp thu a sawi zui a ni.
Sogavare chu kum nga a rorel chuhng leh an rama Chinese investment a pung thur thur bawk si avangin sawisel a hlawh hle bawk a ni.
Solomon-ah hian mi 700,000 vel chengin ram rethei tak niin thliarkar za chuang awmna a ni bawk a. Mipui 80% te chu capital Honiara pawna cheng niin electricity, school, medical clincis leh mass transport basic service takngial pawh awlsam taka la awm lohna a ni.
Solomon Islands-ah China thlawptu PM atan thlang
Get real time updates directly on you device, subscribe now.
Next Post