Somalia-a al-Shabab-te khualbuk luhchilh la let

Somalia-a al-Shabab-te khualbuk luhchilh la let
Somali venhim hna thawktute chuan darkar 24 chhung vel Islamist firfiakten an ram laili, Beledweyne khawpuia khualbuk lar tak an luhchilh chu an titawp ta tih thuneituten an puang.
Al-Shabab hian car bomb an tihpuah hnuah silai kengten khualbuk hi an luhchilh zui a, inbeihna nasa tak a thleng zui.
“Beitute hi thah kim an ni tawh a. Thenkhat chu anmahni intipuakin thenkhat chu police-in an that a ni,” tiin Beledweyne district Mayor Omar Osman Calasow chuan BBC a hrilh.
Mayor hian mi pasarih an thi tih a sawi a, thil thleng hmutute erawh chuan a aia tam niin an sawi ve thung.
Qahira Hotel luhchilh a nih lai hian a chhungah hian Somalia lailia al-Shabab laka beihpui thlak dan tur sawihovin politician, venhim hna thawktu lian leh an ram dana hotu liante an awm mek.
Police officer Ali Mahad chuan thutkhawmnaa tel tam zawk hi chu an chhanchhuak thei tih AFP news agency a hrilh.
Beledweyne atanga an ram rorel khawla tel, Dahir Amin Jesow chuan khualbuk hi mi pasarih chuangin an luhchilh niin a sawi.
Hliam tuar engzat nge awm hriat a ni lo va, Jesow-a chuan a tul anga an khawpui, Mogadishu-a enkawl tura lak turin thlawhna ruahman a ni tih a sawi.
Khualbuk bula dawrkai, Ali Suleiman chuan sipai leh a beitute inkahnaa khualbuk thenkhat hi a chhia tih Reuters news agency hnenah a sawi.
Calasow-a chuan darkar 24 chhung vel khualbuk awp behna hi Nilaini tuk khan a tawp tih sawiin ‘tlem chhia a awm’ tih a sawi a. “Thi zingah hian sipai officer, hnam hotu leh sipai an tel,” a ti.
Al-Shabab chuan mi 20 an that niin an sawi a, heng zingah hian sorkar hotu lian leh sorkar thlawptu hel pawla an hotute an tel tih an sawi.
Sorkar chuan an chhui zui mek a, hotu lian an thi tel tih sawi chungchang hi engmah an la sawi ve lo.
Hirshabelle state President Ali Abdullahi Hussein-a’n thuchhuah a siamah venhim hna thawktuten huaisen taka helho an beihnaah a fak.
Beledweyne hi Mogadishu atanga hmar lam km 335-a hlaa awm niin sorkarin al-Shabab laka beihpui a thlaknaa an hmun pawimawh tak a ni.
Somali sipaite hian African Union peacekeeper-te nen helho lakah beihpui hi an thlak mek a, an bei nasa hle chungin an la lian viah tho a ni.