Sorkar duh lohna lantir zeuh zeuh

Manipur-ah sorkar thar a ding a, he state-a Zo hnahthlakte’n sorkar thar duh lohna an lantir zeuh zeuh; Ningani pawh khan lian tham taka che an awm.
February ni 4-ah chief minister atan Yumnam Khemchand Singh lakluh a ni a, deputy chief minister atan Zo hnahthlak Nemcha Kipgen pawh rinawmna thu tiamtira lakluh a ni. Zo hnahthlakte zingah sorkar thar duh lohna thawm a ring a, thawm pawh an nei deuh reng.
May ni 3, 2023 atangin Manipur-a Zo hnahthlakte leh Meitei an intibuai a, nasa taka an inbeih hnuah nikum khan President’s Rule puan a ni. President’s Rule hi February ni 15-a tawp tur a ni a, India sorkarin President’s Rule puan chhunzawm lova sorkar thar din a tum a, tun thla tirah sorkar thar chu a ding ta a ni.
Sorkar thar din tuma hmalak a nih lai atangin Zo hnahthlakte’n an buaina ching fel hmasa lova sorkar din an duh loh thu an aupui a, sorkar a din hnuah pawh lungawi lo thawm a ring nghal.
Deputy chief minister atan Kangpokpi bialtu Nemcha Kipgen lakluh a ni a, Ngursanglur leh LM Khaute te minister ni tura sawi thawm a awm bawk. Mahse anni pahnih hi tun thlengin lakluh an la ni lo. Ngursanglur hian buaina hi silai hmanga chin fel theih a ni lo a, chuvangin chin fel a nih theih nan sorkar thar a thlawp tih a sawi a, LM Khaute hi chu a tawng chhuak rih lo nia ngaih a ni.
LM Khaute hi Churachandpur bialtu MLA a ni a, Ningani chhunah khan Churachandpur-a a in velah hmeichhe pawl pakhat chu lungawi lohna lantirin an pungkhawm. Thawm an nei deuh laih a, a zanah pawh hemi thil kal zelah hian Churachanpur-ah hian thawm a awm zui. Zirtawpni chhun lamah kha chuan thawm a awm zui lo tih thu dawn a ni.
February ni 5 zan tirah khan Churachandpur-ah hian sorkar thar dh lo thalai thenkhat an chhuak khawm a, venhim hnathawktute nen a inum. February ni 6-ah khan Zo-Kuki Council te’n hmun hrang hrangah total bandh an huaihawt a, khaw thenkhatah chuan kawng an zawh.
Hetih lai hian Ukhrul district-ah Kuki-Zo leh Tangkhul an intibuai a, sorkar thar chungchang nen inzawmna a nei em tih hriat a ni chiah lo.
“Khawsak phung a buai lo a, mahse thil ri leh hluai hi a awm thin a. Ralmuan thu-ah chuan kan ralmuang e,” Churachandpur-a pa pakhat chuan a ti a, sorkar thar duh lohna thawm hi a ring a, mahse buaina lian tham chu a chhuak rih lo tih a sawi.