Sorkar hnathawkte’n Healthcare Scheme duh lo

Mizoram sorkar hnuaia thawkte inzawmkhawmna Federation of Mizoram Government Employees & Workers (FMGE&W) chuan Ningani khan chief minister hnenah Mizoram Universal Healthcare Scheme (MUHCS) an duh loh thu an thlen.
MUHCS-in sorkar hnathawkte a huam tur thuin a thawng a, an hlawh cut-na order chhuah a ni bawk tih an sawi a, tuna an kal dan aiin an dinhmun a chhe zawk dawn a, anmahni leh an chhungte tan a manganthlak dawn tih an sawi.
An lehkhaa a lan danin, Special Assembly-ah MUHCS an duh loh thu, mipui leh pensioner-te hmantir an nih pawhin sorkar hnathawkte chu min hmantir ve lo se, CCS(MA) Rules 1944 min hman zuitir turin sorkar ngen ni se tia an lo rel tawh thu leh, 28.8.2024-ah chief minister hnenah chumi ngenna chu an thehlut tih sawiin, ‘Ka hovin kan en zui tawh dawn nia.’ tia a lo chhan avanga ngaihtha taka an ngaihchan thu sawiin, “Hetiang a nih lai hian MUHCS chu sorkar hnathawkte huamin 1st April 2025 atangin hman tan tur a nih thu min puan hnan ta mai a, kan hlawh cut-na tur order te chhuah a ni zui ta bawk a. Hei hian sorkar hnathawkte min thawng hle mai a,” an ti.
“Chutih laiin private damdawi in lamte kan han biakin cashless facility hi an pawm theih dawn loh thu lehg MUHCS hnuaiah hian empanel pawh an tum lo niin kan lo hre bawk a. Tin, package rate hi private damdawi inte hian lo pawm thei pawh ni sela a rate-in a huam loh chin senso kha dam lote’n kan chawi leh tho a ngaih dawn chuan tuna kan kal dan ai hian kan dinhmun a chhe zawk dawn a. Kan hlawh atanga pawisa cut sak kan nih mai bakah kan senso zawng zawng bill thei chuang si lovin kan chawi belh leh dawn tho tihna a ni dawn a. Sorkar hnathawkte leh an chhungte tan chuan a manganthlak chho hle dawn a ni,” an ti.
March ni 24 khan an ngaihtuah tawh tih te, service association hrang hrang atangin nawrna a nasa tak zet tih te, chuvangin April ni 8-a General Conference an hman turah pawh agenda-ah an telh tih te an sawi.
Chief minister hi MUHCS kal dan tur siam fel a nih hma chu sorkar hnathawkte huamtir lo turin an ngen nawn leh tih an sawi.