Sorkarin Rs 100 man tur a tih Rs 80-in hralh mek

Mizoram sorkarin hmunphiah ro kg-ah Rs 100 man tur a ti a, Vairengte leh a chhehvel khuaa hmunphiah chingtute’n Rs 80-in an hralh mek.
Thu dawn danin, Vairengte leh a chhehvelah hian hmunphiah ro second class kg-ah Rs 75-in an hralh mek a, first class Rs 80-in an hralh mek.
Sorkarin a rawn lei si lo a, a theih ang anga kan nawr liam a ngai a, kum dang aia tlawmin kan hralh mek, an ti.
Budget Session neih mekah chief minister Lalduhoma’n “Tuna an hralh bang ang zawng zawng hi kan lei vek dawn. A vaiin kan lei dawn tho,” a tih chungchangah, vawiin thlengin sorkarin a la lei lo tih an sawi a, hmunphiah hralh hun a liam mek thu leh, hralh tur a awm loh tep tawh thu an sawi.
“Keiniah hi chuan January thla laihawl ataga February thla laihawl hi hmunphiah hralh hun a ni ber a, chu chu a liam tawh a. Tuna kan hralh hi chu tlem azawng a ni tawh a, kan hlawhtling lo tih hi a chiang tawh,” Vairengte-a hmunphiah hmun neitu pakhat chuan a ti a, “Marpara vel leh khawchhak lamah a ro kg-a Rs 100-a sorkarin a leisak a nih chuan kan lawmpui ngawt ang. Keini aia an tlai deuh a nih chuan hralh tur an la nei te pawh a ni ang a,” a ti bawk.
Chief minister-in a hring lei kan intiam lo tiin House-ah a sawi a, “Tlawm deuh hian a hringin an lo dek ral leh mai thin a. A ro lei tur hi a tam lem lo a,” a ti a, hei hi mak an tih thu an sawi.
Sorkarin a hring lei a intiam lo tih an hriat ngai loh thu an sawi a, lo intiam lo pawh ni se a ro man tur an bituk avanga a hring man pawh tlahniam a nih thu an sawi.
An sawi dnain, a hring kg 3-ah a ro kg 1 a chhuak a, a hring chu kg-ah Rs 40-in an tan a, chu chu a leitute’n an inlan a, Rs 50-ah te, Rs 60-ah a te a kai thin. A ro pawh kg-ah kg-ah Rs 150 te, Rs 160 te a ni thin a, a ro man Rs 100 a nih dawn chuan a hring man kha a tlahniam ta lo thei lo an ti.
‘A ro chauh lei turin lo intiam pawh ni se a ro man Rs 100 an ti hi alawm a rate tichhetu. Hmunphiah market an hre lo a ni, hmunphiah ro kg-a Rs 100 hi a hniam lutuk,’ hmunphiah hmun neitute chuan an ti.
A hring hi kg-ah Rs 13 man a nih lai te a awm a, tunah chuan Rs 15 vel a ni an ti.
A man a hniam chungin an kek tho a, kum thar atan hmunphiah hmun tihfai a ngaih tho avangin an kek tho a, a hralh theihna ang angah an hralh mai a ngai an ti.