South Africa in semi-final an hnaih

Cricket World Cup khelh mekah South Africa chuan Punbe-a an khingpui New Zealand chu run 190 ngawtin an sawp a, semi-final an lut. South Africa hian he thu buatsaih lai thleng hian India lehpelin hma an hruai a, India aiin an khel tawm zawk hret thung.
Top 4 huanga awm mek South Africa leh New Zealand an inhmachhawn tum hian South Africa in an vaw hmasa a, a che tha hle. Over 50-ah run 357 zet an siam a, mi pali chiah an out bawk. South Africa tan hian Van der Dussen chuan ball 118 a hmachhawn atangin run 133 ngawt a siam a, Dussen hi an chakna hnar pawi-mawh a ni. Ani bakah hian chuan De Kock ball 116 atanga run 114 siamin, century a hlap chhuak ve bawk. Dussen leh Kock bakah hian Miller chuan ball 30 atangin run 53 a siam ve bawk.
Target hautak tak um ngai New Zealand vuak hun a thleng a, South Africa bowler te an ngam lova, run an siam hleithei meuh lo. Over 35.3-ah run 167 chiah an siam a, an out fai vek. New Zealand tan hian Glen Phillips chuan ball 50 atangin run 60 a siam thei hram. Phillips hi New Zealand tana chetha ber a ni a, midang chu run siam tam thei lo vin an out zawih zawih. New Zealand in run 167 bak an siam theih loh vangin South Africa chuan run 190 ngawtin an chak a, hnehna pawimawh tak an chang. New Zealand sawptu South Africa hian vawi sarih khel tawhin, vawi ruk an chak. Point 12 an hmu a, India lehpelin hmahruaitu thar an ni. South Africa lakah tlawm chiang viau mah se New Zealand hian khelh sarih atanga point 8 hmuin pa linaah an awm chhunzawm ve tho bawk.
India ram khawpui hrang hranga khelh mek Cricket World Cup-ah a thlengtu India an chetha rih viau a, vawi ruk an chak zawn tawh. India hi ram 10 inel zingah la chak vek awmchhun a ni. India hian Ningani tlai khan Sri Lanka an hmachhawn a, result kan tar lang hman lo. India hi an chak nawn leh a nih chuan South Africa lehpelin hma an hruai nawn leh ang a, semi-final lut tluk an ni hial tawh dawn bawk a, an tan chak a pawimawh hle.