South Korean president tharin inlungrual nana thawh tiam

South Korean president tharin inlungrual nana thawh tiam
South Korea-a president thar atana thlan chhuah a nih hnu lawka Nilainia lak luhnaah Lee Jae-myung chuan ‘mipuite inpumkhatna’ tura hma lak a tiam.
Lee-a hi an rama mipui rilru inang lo tak a awm laia pisa luah tur a ni a, Devember thla khan President Yoon Suk Yeol-a’n martial law a puan thut atangin mipuite ngaihdan hi a phir nasa hle a ni.
“Economy tichak thar leh tur leh mipui tidam turin hna ka thawk nghal ang,” tiin National Assembly-a lak luhnaa mipui hmaah a sawi a. “Tun inthlanah hian i tan zawk chu tu pawh ni sela, kei hi mipuite president ka ni dawn a ni,” a ti.
Eptu, Democratic Party-in an dintir, Lee-a hian inthlanah khan vote tla zinga 50% dawn hmuin hnehna a chang.
An ram politics chiri tak chu ‘politics-a pawl hrang, mipuite tana hna thawh duhna rilru reng reng pui lote thil tih vanga’ chhuak niin a puh bawk.
“Mipui an inlungrual theih nan ka thawk dawn a ni,” a ti a, ‘intihhranna politics titawptu president a ni dawn’ tih a sawi bawk.
Tual chhunga tih hmabak lian tak tak a neih rual hian Lee-a hian ram dang nena an inkungkaihna thilah hna huphurhawm tak tak tak a nei tel nghal a. Heng zingah hian US-a Donald Trump-a sorkar hnua US-Korea inkungkaihna kawnga hma lak thar te, hemi kara China nena an inkar te leh an thenawm, North Korea nena inhnimhnaih zel dan turte pawh hna hautak a ni.
Lee-a hian an ram chu ‘inpawt fan thei, tum bil neia kal’ turin a hruai dawn tih a sawi a, emergency economic task force chu ‘rang taka siama hmalak nghal’ a nih tur thu a sawi bawk.